Ам.долларын төгрөгтэй харьцах ханш тодорхой хэмжээнд буураад байгаа. Чухам энэ бууралт нь ямар хугацаанд үргэлжлэх вэ, цаашдын төлөв нь ямар байх вэ гэсэн асуулт тавигдаж буй. Тэгвэл Монголбанкны  Зах зээлийн газрын захирал Ж.Батаа хэлэхдээ “Он гарснаас хойш эдийн засгийн суурь үзүүлэлтүүдэд хэд хэдэн эерэг өөрчлөлт гарлаа. Юуны өмнө хэрэглээний үнийн индексээр илэрхийлсэн жилийн инфляци энэ оны тавдугаар сарын эцэст 1.8 хувьтай байна. Урсгал тэнцэл дөрөвдүгээр сарын байдлаар 86.6 сая ам.доллар, хөрөнгө санхүүгийн тэнцэл 279.3 сая ам.долларын ашигтай гарсан. Ингэснээр манай улсын дөрөвдүгээр сарын төлбөрийн нийт тэнцэл 202.3 сая ам.долларын эерэг дүнтэй байгаа нь өмнөх оны мөн үеэс 522.8 сая ам.доллараар сайжирсан гэсэн үг. Нөгөө талаас гадаад эдийн засаг дахь түүхий эдийн үнэд сэргэлтийн шинж тэмдгүүд ажиглагдаж эхэлсэн. Оны эхнээс төмрийн хүдрийн үнэ 15.9 хувь, зэсийн үнэ 0.3 хувь, алтны үнэ 20.2 хувиар тус тус өсөөд байна. Цаашилбал Монгол Улсын эдийн засгийн өсөлтийн хурд 2017 оноос эхлэн эргэн сэргэж, 2020 он гэхэд 10 хувиас дээш өсөлттэй байхаар Олон улсын валютын сан таамагласан. 2016 оны гуравдугаар сарын Монголбанкны “инфляцийн төлөв байдлын тайлан”-д оны эцэст төлбөрийн тэнцэл сүүлийн гурван жилд анх удаа эерэг гарах хүлээлттэй байгаа зэрэг нь валютын зах тогтвортой байх нөхцөлийг бүрдүүлэхээр байна.” гэсэн байна.

Эх сурвалж: Б.Тамир, Шуурхай.мн