Автобусны жолооч нартай холбоотой таагүй мэдээлэл өдөр бүр гарах юм. Үнэнийг хэлэхэд амьгүй мал, мах ачсан яваа юм шиг л аашилдаг тэд нарт хатуухан арга хэмжээ авдаг баймаар юмаа. Ямар ч харилцааны соёлгүй, замын хөдөлгөөнд оролцож байж, анхаарал сэрэмжгүй, хариуцлагагүй, огцом тооромзлох, осол гаргах, явган хүнийг мөргөж гэмтээх, зорчигчдоо элдвээр доромжилж, эрээ цээргүй загнах нь энүүхэнд.

Ямар хүмүүс нийтийн тээвэр жолоодож, иргэдэд үйлчлээд байдгийг мэдэхэд бүр хэцүү. Дандаа л автобусны жолооч осол гаргаж, зорчигч бэртлээ, амиа алдлаа гэх мэдээлэл олон удаа гарч байсан. Өнгөрсөн жил гэхэд автобусанд зорчиж явсан өндөр настай иргэн огцом тооромзолсноос болж автобусан дотор унаж амиа алдсан харамсалтай хэрэг гарсан билээ. Тэгвэл өдөр бүр л автобусны жолоочтой холбоотой таагүй осол аваар гарсаар байна. Бид хэнд амь насаа даатгачихаад автобусаар үйлчлүүлээд байгаа юм бэ. Өчигдөг гэхэд автобусны жолоочтой холбоотой хэрэг цагдаагийн байгууллагад бүртгэгджээ.

Тодруулбал, СХД-15 “ГССҮТөвд “Хар Хорин” захын хойд замд автобусанд зорчиж яваад гэмтсэн хүн ирлээ” гэсэн мэдээллийг шалгахад, “Нарангийн гол-Дүнжингарав” чиглэлд явсан “….” ХХК-ны “Hyundai” автобусны жолооч Ж нь тээврийн хэрэгсэлийг огцом зогсоох үйлдэл хийснээс зорчигч СХД-2 хороонд суух 65 настай эмэгтэй И нь бариулын багана мөргөж 2 хавирга хугарсан, БГД-6 хороонд суух нэг настай М нь багана мөргөж тархи доргиж гэмтсэнийг цагдаагийн хэлтсээс шалгаж байна.

Эх сурвалж: О.Сайхан Zaluu.com