УИХ-ын сонгуулийн сурталчилгаа өнөөдрөөс эхэлж байгаа. Сурталчилгааны хугацаа дөхөх тусам олон нийтэд хаалттай байсан төрийн алба урд хожид байгаагүйгээрээ нээлттэй болж, яамныхаа байранд мэдээлэл хийхгүйгээрээ сэтгүүлчдээ бодох болсон. Өмнө нь нэг нэгээрээ хувийн тоглолт хийдэг байсан улс төрчид энэ удаад Засгийн газрын кабинетын гишүүдээрээ нэгдэн тоглолт хийдэг болсныг харуулж байна. Өөрөөр хэлбэл популист улс төрчөөс популист засгийн газар руу шилжжээ.

Эдийн засаг элгээрээ хэвтсэн энэ цаг үед Ч.Сайханбилэгийн засгийн газар сонгуулийн дараа “татан буугдана”. Татан буугдахаасаа өмнө Засгийн газраас огцом популист хийж, оноо авахыг хүссэн бололтой гэнэт ахмадууддаа хайр зарлан тэтгэврийг 20 000 төгрөгөөр нэмэв. Тодруулбал, 2016-05-31-ны өдөр Засгийн газрын хуралдаан хийж, энэ сараас эхлэн ахмадуудын тэтгэврийг 20 000 төгрөгөөр нэмж, инфляцид уялдуулж байна гэх мэтээр сайхан л тайлбарласан. Гэтэл өргөн хэрэглээний барааны үнэ өнгөрсөн хугацаанд хэдэн хувиар өссөнийг, иргэд талх таллаж, ургамлын тос граммлаж, жижиглэн, нохойн хоолоор амь зууж байгааг бодон бодит амьдралтай танилцаж, хөрсөн дээрээ бууж, амьдралд наалдсан шийдвэр гаргаагүйг хэлэх хүн цөөнгүй. Өмнө нь улсад мөнгө байхгүй, нэмэх боломжгүй, уучлаарай хэмээн ам таглаж байсан ч сонгуулийн өмнө ийнхүү гэнэт хайр зарласан нь сонин байлаа.

Засгийн газраас санаачилсан популист занг ойлгож амжаагүй байтал гэнэт хуралдан 1072 хувьцааныхаа 30 хувийг зарах юм бол 300 000 төгрөгөөр авъя гэв. Нөгөөдрөөс банкан дээр очоод л асуудалгүй ав гэж байгаа. Уг нь төсөвт тодотгол хийх хэмжээнд хүрсэн хэцүү байгаа. Гэтэл асуудалгүй банканд очоод мөнгөө ав гэх. Тэгвэл асуудалгүй гээд байгаа мөнгийг хаанаас гарах юм бэ? Мөнгө хэвлэх юм уу? Энэ улс чинь дампуурлаа шүү дээ. Хувьцаа, хувьцааны ханшийг Засгийн газар, арилжааны банк биш, хөрөнгийн бирж зах зээл тогтоодог гэдгийг улс төрчид мэдэх ёстой баймаар.

Улс орон чинь элгээрээ хэвтэж байхад, төсөв алдагдалтай байгаа энэ цаг үед хэрхэн тэтгэвэр нэмж, 1072 хувьцааны 30 хувийг худалдан авах гэж байгаа юм бэ? Мөнгө хэвлэх юм бол дампуурал руугаа ойртож байгааг, зээл авах юм бол “өтөндөө” баригдахын цондон гэдгийг Засгийн газар мэдэхийн дээдээр мэдэж байгаа. Гэтэл өөрсдөө оноо авахын төлөө ийнхүү аашилж байгаа нь иргэдийн сэтгэл зүйгээр тоглохоо болих хэрэгтэй. Та бүхнийг ингэж хайр зарласан зарлаагүй иргэд үнэлэлт дүгнэлтээ өгдгөөрөө л өгөх болно.

Эх сурвалж: Dorgio.mn