Энэ жилийн сонгуулийн тухайд улстөрийн намууд хийгээд нэр дэвшигчдийн амлалтууд нь урьд урьдын сонгуулиудаас төдийлөн ялгаатай харагдахгүй байгаа. Харин сонин содон нөхдүүд олноор нэр дэвшиж байгаагаараа өмнөх сонгуулиудаас ялгаатай байж болох юм. Гэхдээ тэдгээр нөхдүүд дунд улсаа гэсэн сэтгэл хийгээд зүтгэлтэй хүн огт байхгүй гэсэн дүгнэлтийг шууд хийж болохгүй л дээ. Тухайлбал, УИХ-ын сонгуулийн 54 дүгээр тойрогт нэр дэвшигчид дунд нэгэнтээ олны танил болсон тэр ч утгаараа сонирхолтой хүмүүс гэх ангилалд багтах нэр дэвшигчид хэд хэд бий.

            Өнөөдрийн тухайд тус тойрогт нэр дэвшихээр болсон 13 нэр дэвшигч Сонгуулийн Ерөнхий Хорооноос үнэмлэхээ авч байна. Тэдгээр нэр дэвшигчид бол “Монгол тулгатны 100 эрхэм” нэвтрүүлгээр олонд танигдсан П.Анужин МАН-аас, МАН-аас гарч АН-д орж харьяалал хийгээд чиг зүгээ нэгэнтээ өөрчилсөн Д.Арвин, нэрт жүжигчин Цагааны Цэгмидийн хүү өөрөө ч авьяаслаг жүжигчин Ц.Төмөрбаатар, Монголын нийгмийг сайн сайхан байгаасай гэж сүүлийн жилүүдэд үзэл бодлоо илэрхийлж, үйлдлээрээ тэмцэх болсон МУГЖ Самандын Жавхлан нар байна. За мөн “Тусгаар тогтнол эв нэгдэл” эвслээс Б.Чулуунбат, Монголын Уламжлалын Нэгдсэн Намаас Л.Жаргалсайхан, Бүгд Найрамдах Намаас Б.Одсүрэн, Монголын Социал Демократ Намаас Д.Төмөрбаатар, Иргэний Хөдөлгөөний Намаас Г.Ичинхорлоо, Монголын Ардчилсан Хөдөлгөөний Намаас Л.Эрдэнэтуул, Ард Түмнээ Хайрлая Намаас Б.Гантулга нар нэр дэвшиж байгаа бол Хөдөлмөрийн Үндэсний Намын дарга С.Боргил, Монголын шууд худалдааны нийгэмлэгийн ерөнхийлөгч М.Баярбат нар бие даан нэр дэвшиж байгаа юм.

           Нэр дэвших эрх ийнхүү 13 хүнд олгогдож байгаа ч, өрсөлдөөн бол гарын таван хуруунд багтах хүмүүсийн дунд явагдахаар байгаа нь прогнозоос харагдаж буй. Тэрдундаа улстөрийн бохир заваантай хутгалдаагүй, харьцангуй нэр цэвэр, урваж шарваж яваагүй, хөшигний цаана орохоороо өөр дүр эсгэдэггүй янзын тийм л хүнийг сонгогчид хүлээж байгаад эргэлзэх хэрэг үгүй болов уу.

Б.Тамир

Эх сурвалж: Шуурхай.мн