Ерөнхий сайд асан С.Баяр өөрийнхөө улстөрийн цагийг дууссан гэж албан ёсоор хэлээгүй. Тиймээс ч тэрээр  сүүлийн өдрүүдэд саарал ордонд өнжих болсон нь сонгууль хаяанд тулсан энэ үед анхаарал татаж байгаа. Мэдээж намаа ялалт байгуулчихаасай гэж хүсэн хүлээж байгаа ч биз. Туршлагатай улстөрчийн хувиар түүний үг бусдадаа хэрэгтэй ч байдаг биз. Өнгөрсөн хугацаанд тэрээр чамгүй хэл аманд орооцолдоод авсан нь бас үнэн. Ямартаа л Г.Уянга гишүүн түүнийг авлигын мөнгөөр Америкт 7 хаус авсан гэх мэдээллийг цацсан. Тэгсэн сая оффшорын дуулиан дунд охидуудынх нь нэрс ч бас байж байсан. Ер нь бол С.Баяраас ёс зүй шаардсан мэдээллүүд энэ мэтээр цөөнгүй гарч байна.

Ямартай ч тэрээр Г.Уянга гишүүний хэлж ярьсны дараа Америкаас Монголын хэвлэлд дараах зүйлийг ярьсан байдаг. Юу гэхээр “-АНУ-д байгаа миний алдарт долоон хаусын тухай юу. Сонссон, уншсан. Сүрдмээр мэдээлэл, сүртэй зураг гарсан байна билээ. Тоо нь хүртэл заавал долоо байдаг нь ч юу билээ. Дордохын долоо байх ёстой юм байлгүй, яршиг л байна.

-Би солиотой биш. Чи сайн бод л доо. Эрүүл ухаантай хүнд нэг газар долоон байшин авах хэрэг байна уу. Ганц биеэ долоо хуваагаад энд тэнд суултай нь биш. Угтаа бол нэгхэн биед нэг газар л байх хэрэгтэй баймаар. Энэ тухай би нэг бус удаа ярьж байсан. Одоо дахин давтан хэлье, надад АНУ-д эсвэл өөр ямар нэг улс гүрэнд эзэмшдэг байшин, хаус нэг ширхэг ч байхгүй. Байшин сав байтугай гадас шаагаад босгосон майхан ч үгүй. Гэхдээ асуудал тэр байшин саванд байгаа юм биш. Тийм томоохон байшингуудыг маш их мөнгөөр, олон сая ам.доллараар авсан байж таарна гэж хардахад байгаа юм. Тиймээс энэ бүх яриа яагаад гардаг, юутай холбоотой нь тодорхой.” хэмээн өгүүлсэн байдаг юм.

Б.Тамир

Эх сурвалж: Шуурхай.мн