Хаврын чуулган энэ долоо хоногт хаана гэх мэдээлэл байгаа. Гэтэл хэлэлцэх асуудлын жагсаалтад АТГ-ын даргын томилгооны асуудлыг багтаагаагүй байгаа нь анхаарал татаж буй. Хуульд зааснаар АТГ-ын даргыг Монгол Улсын Ерөнхийлөгч санал болгож, УИХ-аас томилдог. Энэ дагуу хурандаа Х.Энхжаргалыг АТГ-ын даргаар томилуулах хүсэлтийг тавдугаар сарын 4-нд УИХ-д хүргүүлсэн. УИХ-ын Хууль зүйн байнгын хороогоор энэ асуудлыг хэлэлцэх байсан ч УИХ дахь Ардчилсан намын бүлэг завсарлага авч, хойшлуулсан юм.  Завсарлага авах болсон үндэслэлээ Б.Гарамгайбаатар “Бүлгээр асуудлыг ярих шаардлага байна” гэж тайлбарласан ч  бүлэг нь хуралдаагүй юм. Ийм маягаар удаагаад байгаагийн цаана байгаа шалтгааныг хэвлэлүүд янз бүрээр тайлбарлаж байгаа. Тэгвэл Ерөнхийлөгчийн Хуулийн бодлогын зөвлөх Ч.Өнөрбаяр уг асуудлаар байр сууриа илэрхийлсэн байна. Авлигатай тэмцэх газрын даргыг томилохгүй хугацаа алдаж байгаатай холбоотойгоор уг асуудлыг  хуульд хэрхэн  зохицуулсан байдаг юм бэ гэсэн байдаггүй юм уу гэх асуулт тавигдаж байгаа. Ч.Өнөрбаяр энэ тал дээр хэлэхдээ “-Маш тодорхой хуулийн зохицуулалт бий. УИХ-ын дэгийн тухай хуулийн 45 дугаар зүйлд зааснаар Авлигатай тэмцэх газрын даргыг томилуулах саналыг Монгол Улсын Ерөнхийлөгч гаргасан бол УИХ-ын холбогдох байнгын хороо 7 хоногийн дотор хэлэлцэж санал, дүгнэлтээ гаргах ёстой. Дараа нь нэгдсэн чуулганаар Монгол Улсын Ерөнхийлөгчийн санал, холбогдох байнгын хорооны санал, дүгнэлтийг сонсож илээр санал хураалт явуулж, хуралдаанд оролцсон гишүүдийн олонхийн саналаар томилох эсэхийг шийдвэрлэдэг хуультай.” гэжээ.  Тэгэхээр асуудал чуулганаар орохоос өмнө байнгын хорооноос гарсан байх ёстой гэдэг үүдээсээ бол Хууль зүйн байнгын хороо хууль зөрчжээ. Харин тус байнгын хороог хууль зөрчихөд хүргэсэн тал нь АН болж таарч байна. Ер нь бол АТГ-ын даргын томилгоог улстөржүүлэлгүй шийдсэн бол хэдийнэ тус газар даргатай болчих байсан хуулийн хугацаа өнгөрөөд байна.

Б.Тамир

Эх сурвалж: Шуурхай.мн