Монголын эдийн засагт стратегийн ихээхэн ач холбогдолтой гэгддэг Тавантолгойн хөрөнгө оруулалтын гэрээ байгуулагдах дээрээ тулаад байсан нь саяхан. Гэвч тэгээд бодит үндэслэлүүд гэхээсээ бүлэглэл хоорондын тэмцлийн улмаас хэлцэл тохироонууд зогссон харагддаг. Тэгвэл УИХ-ын гишүүн Л.Эрдэнэчимэгээр ахлуулсан ажлын хэсэг  Засгийн газраас боловсруулсан Таван толгойн гэрээний төсөлд хийсэн дүгнэлтээ танилцуулаад байсан бол одоо УИХ-ын тогтоолын төслөө өргөн барихаар болсон байна.

Л.Эрдэнэчимэг гишүүн өмнө нь хэлэхдээ  “Эрдэнэс Тавантолгой компани Тавантолгойн 51 хувийг эзэмших ёстой гэсэн тогтоолын төслийг өргөн барина.” гэж байсан. Мөн тэрээр “Таван толгойн гэрээний төсөл хууль журам зөрчсөн талаар хэлэхдээ “-2010 оноос хойш дөрвөн жилийн хугацаанд гарсан Засгийн газар, УИХ-ын тогтоол, аюулгүй байдлын зөвлөлийн шийдвэрүүдийг зөрчсөн. Манай Засгийн газар, УИХ эхлээд нэг гэрээ оруулж ирээд түүнийхээ араас өмнө нь гаргасан тогтоол шийдвэрүүдээ өөрчилдөг жишиг тогтчихож. Энэ жишгээр Таван толгойн гэрээ орж ирсэн. Араас нь 2010-2014 онд оруулж ирсэн бүх тогтоол, шийдвэрүүдээ өөрчлөхөөр төлөвлөгдсөн байна. Харин манай ажлын хэсгээс өмнө нь баталсан шийдвэрүүдээ баримтлах ёстой гэсэн байр суурийг барьж байгаа” гэж байсан юм.

За ямартай ч өргөн барихад бэлэн болсон тогтоолын төсөлд тусгаснаар бол Тавантолгойн 51 хувийг “Эрдэнэс Тавантолгой”-д эзэмшүүлнэ гэж байна. Тэгвэл тус компанийн хувьд Чалкогийн өрөө ч төлж дуусгаж, дийлэхгүй, чадамжгүй байдалтай өдийг хүрсэн.

Б.Тамир

Эх сурвалж: Шуурхай.мн