Сонгуулийн тойргийн хуваарилалтыг дагасан гомдол саналын асуудал магадгүй ирэх дөрвөн жилд хадгалагдах биз ээ. Тэрчлэн Булган аймгийг нэг мандаттай болгосонтой холбоотойгоор Ё.Отгонбаяр гишүүн ихээхэн бухимдалтай явна. Тэрээр хэвлэлд ярихдаа “Ингэж тойргийг тааллаараа хувааж байгаа нь нэг талаас ард түмнээсээ зугтаж байгаа, нөгөө талаас ард түмний сонголтыг өмнөөс нь хийж байгаа үйлдэл. Ийм байдлаар явбал АН-ынханд хэн итгэх юм бэ. Хүн хөндлөнгөөс харвал барилдаад дийлэхгүйгээ мэдчихээд нүд ам руу нь шороо цацаад байдаг ядруу бөх шиг ажил болж байна. Ардчиллын зарчмаас ухарсан алхам болж байна. “Шударга л байя” л даа. Ийм алхам хийж байгаа Монгол Улс хүний эрхийг дээдэлдэг ардчилсан улс мөн үү. Булган аймагт АН-ынхан нэр хүнд муутай байгааг би ойлгож байна. Ингэлээ гээд Булганы ард түмнийг сонголт хийх эрхээр нь боомилж болохгүй шүү дээ. УИХ-ын гишүүн Б.Гарамгайбаатар “Чингис хааны өлгий нутаг учраас Хэнтийд мандат өгсөн юм” гэж тайлбарлаж байна лээ. Тэгвэл Чин ван М.Ханддоржийн нутаг Булган аймгийн мандатыг булаагаад авчихдаг нь яаж байгаа юм бэ. Жанжин Д.Сүхбаатарын нутаг Сүхбаатар аймгийн мандатыг булаагаад авчихдаг нь яаж байгаа юм бэ. Энэ зарчмаар цаашаа явбал Улаанбаатарын туулын хар шугуй Хэрэйдын ван хааны өргөө байсан юм. Улаанбаатараас мандатыг нь хасах хэрэгтэй болж байна уу. Тойргууд ойролцоо маягаар хуваагддаг. Гэтэл тэр Увс аймгийг яачихсан юм бэ дээ. Энэ тэнд нь нөхөөс тавьсан дээл шиг болгочихсон байна. Өвөрхангайг эрүү нь унасан гавлын яс шиг юм хийчихжээ. Энэ болж байгаа процесс сонгогчийн эрх, Үндсэн хуулийг бүдүүлгээр зөрчсөн үйл явдал болж байгаа гэдгийг хэлмээр байна.” гэж байгаа юм.

Эх сурвалж: Шуурхай.мн Б.Тамир