Монголын улстөрийн хүрээний нэр бүхий этгээдүүд оффшор бүсэд данстай, хувьцаа эзэмшдэг гэх мэдээллүүдэд нэр холбогдоод байгаагийн нөгөө талд ямар хариуцлага, шийдэл байх юм бэ гэдэг асуудал тавигдаж байгаа. Тэгвэл Ерөнхийлөгч Ц.Элбэгдорж өөрийн цахим хуудсаараа дамжуулан байр сууриа илэрхийллээ. Тэрээр  “Эргийн гадна/offshore/ данс тойрсон асуудал, мэдээлэлд Монгол улс хариуцлагатай, нээлттэй хандах ёстой. Олон нийтийн дуу хоолойг сонсож, хууль журмаа нарийвчилж, хариуцлагыг шат бүхэнд чангатгах. Албан тушаалтнуудын хөрөнгө орлогын бүртгэл, байршил, хөдөлгөөнийг ил тод болгох, төр иргэдийн хяналтад оруулах ажлыг тууштай үргэлжлүүлэх. Татвар, тайлан бүртгэлээс зугатах, мөнгө угаах, хууль бус орлогоо нуух хэлбэр оролдлого бүрийг илчлэх. Хууль тогтоомжийг алагчлалгүй хэлбэрэлтгүй сахиулах. Дээрхи чиглэлд бодлого боловсруулагчид, хууль хэрэгжүүлэгчдийг санаачлагатай, идэвхтэй ажиллах.” хэмээн бичсэн байна. Дашрамд өгүүлэхэд, анх С.Баярцогтын оффшор дансны мэдээлэл ил болсон ч, хацрыг нь илээд өнгөрсний дараа  Д.Бямбасүрэн эрхэм хэлэхдээ  “…тэр үед төрийн өндөр албаны хүмүүс, Ерөнхийлөгчөөсөө эхлээд агентлагийн дарга нар хүртэл бүх хүмүүсийн гадаадад байршуулсан мөнгө, данс, эзэмшиж байгаа хувьцаа, үл хөдлөх хөрөнгийн тухай мэдээллийг тусад нь гаргуулж авах тухай асуудлыг УИХ шийдэх ёстой байсан. Түүнчлэн төрийн өндөр албан тушаалтнууд гадаадад хөрөнгө мөнгө байршуулахыг зөвшөөрөх эсэх тухай асуудлыг шийдэх ёстой байсан ч, тэгээгүй.“ хэмээн хэлж байсан юм.

Б.Тамир

Эх сурвалж: Шуурхай.мн