Манай улсын хэмжээнд нислэгийн дөрөвхөн компани үйл ажиллагаа явуулдаг.

Эдгээр компани нь бүгд л улстөрчдийн дэмжлэг тэдний хувь, хувьцааны тусламжтайгаар хөл дээрээ зогссон гэхэд болно. Товчхондоо төрийн өмчит “МИАТ” ХК-иас бусад нь бүгд л ардаа улстөрийн том эзэнтэй гэлцдэг.
Тэгвэл улстөрчдийн хувь нийлүүлсэн нислэгийн авиа компани нэгээр нэмэгдээд байна. 2011 оны 11 дүгээр сарын 11-нд Монголын агаарын тээврийн дөрөв дэх компани сүр дуулиантайгаар анхны нислэгээ хийж байсан нь “Монголиан Эйрлайнес” групп байв.
“Монголиан Эйрлайнес” группийн 100 хувийн хувь­цааг өнгөрсөн оны ес­дүгээр сард Батлан хам­гаалахын сайд УИХ-ын гишүүн Л.Болдын “Бодь интернэйшнл” ХХК шил­жүүлж авсан гэдэг. Гэвч энэ компани ардаа хэд хэдэн томоохон хувь эзэмшигчтэй гэнэ. Тухайлбал “Монголиан Эйрлайнес” группийн хувь эзэм­шигчээр ЗТБХБ-ын сайд, УИХ-ын гишүүн Х.Баттулга, “МАК” компанийн захирал Б.Ням­тайшир зэрэг хөрөн­гөтнүүдийн нэрс дуул­дах болжээ. “МАК” ком­панийн хувьд “Мон­голиан Эйрлайнес” группийн хувьцаа эзэмшигч гэдэг нь бараг тодорхой болсон. Учир нь 11 дүгээр сард болсон анхны нислэгийн нээлтийн үеэр “МАК”-ийн дэд захирал Н.Ном­тойбаяр тус компанийн удирд­лагуудтай зэрэгцэн тууз хайчилж байсан билээ. Бүр нис­лэгийн компанийнх нь нэрийн товчлолыг “МАК” ком­панийнхаа нэртэй ижил бол­гожээ.
Харин ЗТБХБ-ын сайд УИХ-ын гишүүн Х.Баттулга шинэхэн нислэгийн компаниас хувьцаа эзэмшдэг гэдгээ ихэд нууцалж байгаа болол­той. Гэхдээ тэрбээр Гадаад харилцааны сайд Г.Зан­даншатарын хамт Засгийн газрыг төлөөлж, анхны нислэгээр нь Баян­хонгор, Өвөрхангай аймгийн чиг­лэлд зорчин хувь ний­лүүлсэн компанийнхаа онгоцыг туршсан.
Хамгийн сонирхолтой нь Х.Баттулга төрийн өмчит “МИАТ” ХК-тай  өрсөл­дөхүйц, цаашилбал дам­пууруулж зах зээлийг нь булаахын тулд “Монголиан Эйр­лайнес” группийг байгуулсан гэх мессэж хүчтэй нисэх болов.
Нэг хэсэг Х.Баттулгыг төрийн өмчит “МИАТ” ХК-ийг хувьчилж авахаар санаар­хаж байгаа тухай хэв­лэлээр шуугиж байсан.
2000 оны дундуур “МИАТ” ХК-ийн үйл ажил­лагаа доголдож, идэж уусан гэх дарга нараас нь болж асар их хөрөнгө мөнгөний өрөнд унасан. Энэ хэл амнаас залхсан “МИАТ” ком­панийн гүйцэтгэх захирал Б.Эрдэнэбилэг 2009 онд аж­лаа өгсөн билээ.
ТӨХ-ноос түүний оронд “МИАТ” ХК-ийн дэд захирал, гавьяат нисгэгч Р.Бат-Эрдэнийг үүрэг гүй­цэт­гэгчээр түр томил­сон ч ЗТБХБ-ын сайд Х.Баттулгад таалагдаагүй. Х.Баттулга ч Р.Бат-Эрдэнийг гүйцэтгэх захирал болгохыг эсэр­гүүцэж байгаагаа ил цагаан илэрхийлжээ.
Ингээд Х.Баттулга ТӨХ-ны дарга асан Д.Сугартай зөв­шилцсөний үндсэн дээр 2010 оны тавдугаар сард “МИАТ” ХК-ийн Маркетингийн ал­баны дарга Ц.Орхоныг гүй­цэтгэх захирлаар томилсон байна.
Гэвч энэ нь Х.Баттулгын “МИАТ” ХК-ийг хувьчилж авахад нөлөөлөөгүй. “МИАТ” ХК-ийг авах Х.Баттулгын санаа нэгэнт бүтэлгүйтсэн тул Л.Болдтой зөвшилцөн төрийн өмчит нислэгийн ком­панийг бут цохих хэмжээний авиа компани байгуулсан гэнэ.
Нөгөөтэйгүүр Х.Баттулга “МИАТ” ХК-ийг авч чадаа­гүй ч олон жилийн дад­лага, туршлагатай төрийн өм­чит компанийн менеж­мент, нэрийг хуул­бар­лаж, туршлагатай мэр­гэ­жилт­нүүдийг нь урвуулж чадсан. Үүний нэг жишээ нь “Монголиан Эйрлайнес” группийн ерөнхий захирал Ч.Хоролсүрэн юм. Ч.Хоролсүрэн өмнө нь “МИАТ” ХК-ийн камерын асуу­дал эрхэлсэн захирлын албан тушаалыг хашиж байв.
Гэсэн ч түүнийг сайдуудын хур хөрөнгөөр бай­гуулагдсан “Монголиан Эйр­лайнес” групп урвуулж, ерөн­хий захирал гэх ал­бан тушаалд томилжээ. Ингэс­нээр “Монголиан Эйрлайнес” группийн үйл ажиллагаа “МИАТ” ХК-ийн менеж­ментээр явагдах биз ээ.
Энэхүү шинэ авиа компанийн нисгэгч, үйлчлэгч нарын дүрэмт хувцасны загварыг Сингапурын нэрт загвар зохион бүтээгч Томас Ви гэгч зохион бүтээж, “Дик’с Бью Монде Пи Тии” хэмээх дүрэмт хувцасны компани үйлдвэрлэж байгаа аж. Харин Х.Баттулгыг Син­гапурын хөрөнгө оруу­лагчидтай олон жил нөхөр­лөж яваа гэдгийг хэн хүнгүй мэдэх биз. Тиймдээ ч шинэ нислэгийн компанийнхаа дүрэмт хувцас үйлдвэрлэгчээр сингапурчуудыг онцолсон бололтой.

Freezone.mn