Улстөрчид сонгуулиас сонгуулийн хооронд ээлжилт тоглолт хийдэг ганцхан сэдэвтэй. Тэр нь С.Зоригийн үхэл гэдэгтэй хүн бүр санал нийлэх биз ээ. Яг л өмнөх жишгээрээ тэд ээлжит тоглолтоо эхлүүлж одоогоос таван сарын өмнө С.Зориг агсны эхнэр Б.Булганыг цагдан хорьсон билээ. Саяхан УИХ-ын гишүүн Ц.Оюунгэрэл нар Б.Булгантай уулзах гэж Төв аймгийн хорих анги руу яваад ирсэн. Нөцөл байдалтай нь газар дээр нь очиж танилцсан гишүүд хэвлэлийнхэнд өгсөн ярилцлагадаа “УИХ-ын ажлын хэсгийн хүрээнд хорих газруудаар явж байхдаа Б.Булганыг хоригдож байгаа газарт яваад очиход, тагнуулын ажилтнууд түүнийг маш нууц гээд нэвтрүүлэхгүй байсан. Нэлээд эсэргүүцэл илэрхийлж, суулт хийж байж дотогшоо нэвтэрсэн. Б.Булганы өрөөнд очоод миний дотор палхийгээд л явчихсан. Бие засах газар нь яг үүдэндээ. Эрчүүд тагнуулын ажилтнууд хөлхөлдөж байхад бие засдаг гэсэн үг. Эрчүүд хоригддог хэсэгт Б.Булганыг ганцааранг нь хорьчихсон. Бүх хүмүүс нь эрчүүд байхад тэр эмэгтэйг яг үүдний сараалжны хажууд ил тодоор бие засуулж байна. Бусад өрөөнүүдэд гаднаас гэрэл орж байхад Б.Булганы өрөө дөрвөн тийшээ харсан өдрийн гэрэлтэй. Маш хурц гэрэлтэй учраас тэр өрөөний бүх зүйл харагдаж байгаа юм. Мөөгөнцөр ургачихсан. Бие засахад нь харагдаж байгаа нь үнэхээр эвгүй санагдсан. Эрүүл мэндийн хувьд нэлээд ядруу байна. Биеийн байдал нь ядруухан, үс нь маш их цайсан байна лээ. Нүд нь амьдрах итгэлтэй, үнэн мөнийг тогтооно гэсэн итгэлтэй байна лээ” хэмээн ярьж байлаа. Тэгвэл С.Зориг агсны эхнэр Б.Булганы бие муудаж, хүндэрсэн тул гурав дахь шатлалын эмнэлэгт үзүүлж, оношлуулах шаардлагатай талаар өмгөөлөгч нь прокурорт өргөдөл гаргажээ. Эх сурвалжийн мэдээлснээр Улсын ерөнхий прокурорын газраас энэхүү өргөдлийг нь хүлээн авч Б.Булганыг Цагдан хорих 461 дүгээр ангид шилжүүлэхээр болсон байна.

Эх сурвалж: