Монголын улс төр Н.Энхбаяргүйгээр үл ойлголцол, биесээ хуурч, мэхлэх, барьцаалах, магтан матах, мат снаа баривчлах, хорих гэх мэт байдлаар шууд гацаанд ордог болохыг харуулж байна. Тэр ч утгаараа саяхан л БНСУ-ыг зорьсон тэрбээр энэ жилийн сонгуульд оролцох мөрөөдлөө биелүүлэхийн тулд төлөвлөгөөгөө хэрэгжүүлэхээр эх орондоо ирсэн.
Төрийн тэргүүнээр сонгогдож байсан түүний хувьд одоо ч дахин улс төрд орох хүслээ намыхнаараа дамжуулан илэрхийлж буй. Тэрбээр хаана ч байсан урт чих, гарнууд нь монголдоо байдаг тул төлөвлөгөө нь тасарч, биелэхгүй байна гэдэг тун ховор. Эгээ л тархи нь ажиллаж, өөрөө амьсгалж л байвал улс төрчид түүний санаснаар хөдөлдөг болжээ. Тэр байтугай Н.Энхбаяр л байхгүй бол “морь унасан толгойгүй хүн” гэдэг шиг болж хувирдаг бололтой. Гэхдээ ганц МАХН-ынхан ч биш шүү. Ямар сайндаа л тэр үзэл баримтлал нэгтэй МАН-тай эвсэх эсэх асуудлыг ярихын зэрэгцээ, АН-тай ялалтын тугаа мандуулахгүй ч, ядаж олуулаа буцаж ирэхэд нь тус болох тохироог тус тус хийчихсэн байх жишээний. Саяхандаа түүний талаар цахим ертөнцөд нэгэн эрхэм “Н.Энхбаяр яг матрёшка шиг. Нээх тусам дотроос нь өөр, өөр төрх гарч ирж байна” гэсэн байна билээ. Яаж тэгж, онож хэлж чадав аа гэмээр байв.
Энэ долоо хоногийн улс төр ердөө түүний зохиомжилсны дагуу явагдаж өнгөрч байна. Бүр нэг биш нэлээд хэдэн төлөвлөгөөг зэрэг зохион, гүйцэтгэх ажиллагаанд ханцуй шамлан орсон. Тиймдээ ч МАН-тай эвсэх тухай, мөрийн хөтөлбөрөө хамтран батлах тухай ярьж байснаа гэнэтхэн “мурьж”, даргыг нь Тусгаар тогтнолын ордноос Төрийн ордонд “бажгадуулж” чадсан. Мэдээж МАН-ын даргатай уулзахаас өмнө амжаад АН-ын даргатай уулзчихсан гэх мэдээллүүд ч бий. Үүнийхээ хүчинд үнэхээр “Н.Энхбаяр юу хүсч байгаагаа АН-аар хийлгэж, МАН-аар хэлүүлж чадлаа”. Үүнийхээ хүчинд зүүний үзэл баримтлалтай эдгээр нам нэгдлээ гэхэд “БИ” толгойлогч хэвээр байна гэдгээ ч бататгасан. Учир нь тэр эвсэх тухай асуудлыг хэлэлцэх ажлын хэсгийнхний тодорхойлсон тоонуудыг хувийг өөрийн нам ашигтай байхаар “дахин” хянуулахаар оролдсон. Хэрвээ эвссэн бол нь нам доторх өөрийн тойргийг дахин идэвхжүүлэх гэсэн башир арга байсан гэхэд ч болохоор. Цаашлаад “Хүүхдүүд” гүйгээд л ирнэ. Намайг сонгуулиар гуйхгүй хаа зайлах вэ” ухааны юм яриад сууж байхад үнэхээр л МАН-ын дарга “туугаад” оччихсон. Эцэст нь “уучлаарай, та хэт шуналтай юм байна” гэдэг үгийг сонсгоод, МАН эвсэхгүй гэдгээ олон нийтэд зарлачихсан.
Харин одоо түүнд дараагийн хувилбар буюу АН-тай хийсэн тохирооны эцсийг үзэх зорилго үлдсэн. Өөрөөр хэлбэл Н.Энхбаярыг ялтайд тооцох эсэх асуудалд улс төрчид, тэр дундаа парламент, Ерөнхийлөгч хэрхэн хандахыг харах үлдлээ.
Учир нь, нөгөө алдарт “Өршөөлийн хуулийг хэрэгжүүлэх арга хэмжээ”-ний тухай тогтоолыг чуулганы хуралдаанаар хэрхэн эцэслэх бол гэдгээс улс төрийнхний дараагийн нүүдэл эхэлнэ.
Н.Энхбаяр өөрөөсөө будсыг боддогүй нэгэн гэдгийг эвлэлдэж чадаагүй намын нөхөд нь ээлж, дараагаараа хэлж байгаа. Зарим нь өнөөг хүртэл “хулхидуулж” дуусаагүй, өмөөрчихсөн л сууж байна. Жишээ нь УИХ-ын гишүүн О.Баасанхүү саяхан л “гурван удаа хулхидууллаа” гээд багтарч унах шахам гүйж явснаа одоо тун ч найрсаг болчихсон намын даргаа өмөөрөөд жигтэйхэн. Нэг л өдөр тэр дөрөв дэх удаагаа “хулхидуулчихлаа” гээд манаргаж явахыг хэн ч үгүйсгэхгүй. Яагаад гэвэл МАХН гэдгийг олон хүн Н.Энхбаяр гэж шууд утгаар нь хардаг.
Тийм ч болохоор улс төрийн нам, хүчнүүд МАХН хэрхэн хөдлөхийг харж, дараагийн шийдвэрүүдээ чиглүүлдэг. Тэр ч утгараа хаврын улс төрийн зохиогчоор Н.Энхбаяр ажиллаж, сонгуулийн тавилтыг ч хийж мэдэхээр болоод байна.

Эх сурвалж: