М.ГАН

Энэ тойрогт горилж байгаа хүн олон ч нэр дэвших нь баараггүй болсон, нам дотроо итгэл хүлээсэн хэдхэн хүний нэр байна. Тодруулбал, МАН-аас УИХ-ын гишүүн Я.Содбаатар, АН-аас УИХ дахь Ардчилсан намын бүлгийн Ажлын албаны дарга С.Дэмчиг, МАХН-аас тус намын Орон нутаг хариуцсан нарийн бичгийн дарга Б.Эрдэнэбилэгт нар юм.

УИХ-ын гишүүн Я.Содбаатарын хувьд Архангайд төрсөн ч Өвөрхангайд дунд сургуулиа төгсч, Улаанбаатар их сургуулийг физикч-инженер мэргэжлээр төгссөн. Монголын Ардчилсан Социалист Залуучуудын Холбоонд нарийн бичгийн дарга, ерөнхий нарийн бичгийн даргаар  ажиллаж байсан.Үйлдвэр, худалдааны сайдын зөвлөх, тус яамны дэд сайд, Мэргэжлийн хяналтын ерөнхий газрын дэд дарга, мөн даргаар ажиллаж байсан. Харин 2008 онд Өвөрхангайд нэр дэвшиж ялагдсаныхаа дараа МАН-ын нарийн бичгийн даргаар ажиллаж байгаад 2012 оны УИХ-ын сонгуульд дахин нэр дэвшиж гишүүнээр сонгогдсон юм. Хэдийгээр анх удаа парламентад сууж байгаа ч өнгөрсөн дөрвөн жилд тулхтай улстөрч, намынхаа удирдлагын төвшинд идэвхтэй ажилладаг залуу боловсон хүчнийх нь нэг гэдэг.

Өвөрхангайд МАН-аас нэр дэвшихээр горилж буй эрхмүүд олон. 2012 оны сонгуулиар ялагдаж, сүүлд МАН хэсэг хугацаанд Засагт хамтрах үеэр сайд болсон Н.Төмөрхүү, С.Чинзориг, аймгийн Засаг дарга Д.Тогтохсүрэн нарыг нэрлэж болно. Тэднээс хэн чансаатай нь хоёр мандаттай Өвөрхангайд Я.Содбаатар гишүүнтэй хамт намаасаа нэр дэвших биз.

Харин АН-ын тухайд Өвөрхангайн гаралтай, өмнө нь энэ тойрогт нэр дэвшсэн, ялсан, ялагдсан, өнгөрсөн сонгуулиар маргаан, будилааны эзэн болж байсан гишүүд бий. Гэвч АН нэр цэвэр, нутагтаа танигдсан, бэлтгэгдсэн залуу боловсон хүчнээ сойно гэж нэлээд эртнээс дуулдсан. Тэр бол УИХ дахь Ардчилсан намын бүлгийн ажлын албаны дарга С.Дэмчиг. Аймгийнхаа оюутан залуучуудын холбоог байгуулж удирдсан, үе тэнгийнхэн болоод аймгийнхаа АН-ын идэвхтэй дэмжигчдэд танил болсон залуу ажээ. Өвөрхангай аймгийн Есөнзүйл суманд төрсөн тэрээр УИХ-ын Тамгын газар болон бүлгийн ажлын алба гээд хууль тогтоох байгууллагын арын албанд 10 гаруй жил ажиллаж парламентын ажилд туршлага хуримтлуулсан нэгэн. МУИС-ийг хуульч, эрх зүйч мэргэжлээр төгссөн С.Дэмчиг оюутны ширээнээс шууд УИХ-ын Тамгын газарт ажилласан юм билээ. Эрх барьж буй намын бүлгийн ажлын албыг удирддаг залууг АН Өвөрхангайд  дэвшүүлэх гэнэ.

АН-ын нөгөө нэр дэвшигч нь аймгийн намын дарга И.Мөнхжаргал, Баялаг бүтээгчдийн холбооны тэргүүн Ч.Даваабаяр, УИХ-ын гишүүн Г.Батхүү нарын нэг гэнэ.

МАХН-аас тус намын Орон нутаг хариуцсан нарийн бичгийн дарга Б.Эрдэнэбилэгтийг Өвөрхангайд нэр дэвшүүлэх аж. Өвөрхангай аймгийн Хувьсгалт залуучуудын эвлэлийн хорооны нэгдүгээр нарийн бичгийн дарга, МАХН-ын Удирдах зөвлөлийн улс төрийн ажилтан, хэсгийн ахлагч, 2000-2004 онд УИХ-ын гишүүн, 2004-2008 Өвөрхангай аймгийн Засаг даргаар ажиллаж байсан. Дараа нь Монгол Улсаас ОХУ-д суугаа Элчин сайдын Худалдаа, эдийн засгийн зөвлөх,  МАН-ын Удирдах зөвлөлд зөвлөх, 2012-2015 онд МХЕГ-ын дэд даргаар ажиллаж байсан. Нам улс төр, төрийн алба, дипломат албанд туршлагатай хүнээ МАХН төрөлх нутаг Өвөрхангайд нь дэвшүүлэх гэнэ.

Эх сурвалж: “Зууны мэдээ” сонин