-УИХ-ын чуулганаар таны асуулга сонслоо. Хоёр жилийн давтамжтай хийгдэж байгаа асуулга гэсэн байх?

-Тийм ээ. Өнөөдрийн энэ асуулга ялангуяа улс оронд тулгамдаж байгаа утаа, төв цэвэрлэх байгууламжийн үнэр зэргийг хамарч байна. Үндсэн хуульд заагдсан “Монгол хүн эрүүл аюулгүй орчинд амьдрах эрхтэй” гэсэн заалтын дагуу энэ ажил явж байгаад талархаж байна. Гол нь эхлэхдээ улстөрийн өнгө аяс оруулсанд харамсаж байна. Өнөөдөр бид энэ цэвэрлэх байгууламжтай холбоотой асуулгууд дээр улстөржихгүй байвал уг нь зүгээр юм. Цаашид анхаарна биз.

УИХ-ын гишүүнээр сонгогдсоноос хойш хоёр удаагийн асуулга явж байна. Би парламентын танхимд хоёр дахь удаагаа эрүүл мэндийн талаас, хөрс, агаарын бохирдлыг хэлэлцүүлж байна. Энд хоёр зүйл хэлмээр байна. Нэгдүгээрт энэ асуудлыг хэлэлцсэн хоёр жилийн хугацаанд яг юу өөрчлөгдсөн бэ. Хоёр жилийн өмнө УИХ-ын чуулганаар энэ асуудлыг хэлэлцээд, энэ чиглэлийн ажил хангалттай хийгдэхгүй байгааг хэлж, хэрхэн сайжруулах, цаашид ямар арга хэмжээ авч ажиллах талаар тодорхой зүйлүүдийг үүрэг болгон өгч байсныг санаж байна.

Утаагаа арилгах ажилтай зэрэгцүүлээд хамгийн энгийнээр бид иргэдийнхээ эрүүл мэндийг хамгаалах аргад суралцах хэрэгтэй байна үүнд анхаараач гэж хариуцсан сайдад нь хэлж байснаа санаж байна. Засгийн газраас иргэдийнхээ эрүүл мэндийг агаарын бохирдлоос хамгаалах, ирээдүйд гарах үр хүүхдүүдийнхээ эрсдлийг бууруулах талаар гишүүний зүгээс үгээ хэлж байсан маань протокольд тэмдэглэгдсэн байх гэж бодож байна.

-Үр дүнгийн тухайд. Засгийн газрын түвшиндээ ахиц гаргасан байна уу, иргэдэд бол мэдрэгдэх юм харагдахгүй юм?

-Энэ танхим дотор асуудал яригдаад танхимаас гараад хэрэгжихгүй байгаад их харамсаж байна. Бид энд гарц хайгаад ярилцдаг, түүнийгээ гараад мартчихдаг. Энэ байдлаассалахгүй бол энэ утаа, хөрсний бохирдол гэх мэт олон асуудал замхраад алга болох нь. Хоёрдугаарт бид утаатай тэмцэнэ гээд олон жил ярилаа. Төрийн байгууллагуудын зүгээс утааг багасгах тал дээр утаагүй зуух, гэрийн дулаалга тараах, сайжруулсан түлш худалдах ажлуудыг Цэвэр агаар сан, Утааг бууруулах үндэсний хороо гэх мэт сайхан нэртэй газрууд хийлээ л гэдэг. Хариуцсан дарга нар нь сүүлдээ авлигад холбогдож, аавын хаалга татсан мэдээ л тарах болж. Иймээс ажил хариуцсан хүмүүсийн сэтгэл дутаад байна уу даа гэж харж байгаа.

-Таныхаар энэ бүхнийг ямар аргаар шийдэх ёстой вэ?

-Цаашид ер нь бид хэрхэх талаар хэдэн санал байна. Хамгийн түрүүнд иргэдийн эрүүл мэндийн асуудал. Үүн дээр анхаараач гэдгийг хотын дарга, орлогч нар, нийслэлийн эрүүл мэндийн газрын дарга, хариуцаж байгаа Байгаль орчны сайд нараас хүсмээр байна. Бид энэ гамшгийн байдлаас хойч ирээдүйгээ эрүүл мэндийн хувьд хамгаалахын тулд чухал ажлуудыг хийж, хэрэгжүүлэх шаардлагатай тулаад байна.

Мэдээж дахин төлөвлөлтийн асуудал, томоохон бүтээн байгуулалтын ажлууд Засгийн газар, УИХ-ын түвшинд эрх зүйн орчныг нь боловсронгуй болгож, схем, бүтцээ зөв гаргаж байж хөрөнгө санхүү босгож байж энэ ажлууд урагшилна. Эдгээр ажлууд явах гэсээр байтал иргэд эрүүл мэндээрээ хохироод дууслаа. Үүнийг бодолцмоор байна.

Сонгинохайрхан дүүрэгт байрлах төв цэвэрлэх байгууламжийн үнэр бүр хэрээс хэтэрсэн. Дүүрэгтээ ажиллаж, иргэдтэйгээ уулзах гэхээс санаа зовж байна шүү дээ. Өөдөөс уур уцаартай хүмүүс угтаж байна. Энэ асуудал дээр онцгой анхаармаар байна. Эрдэмтдийн баг ажиллуулах ёстой байх. Аль болох зардал багатайгаар энэ асуудлыг шийдэх шийдэл олмоор байна. Мэдээж томоохон бүтээн байгуулалт учраас тендэр зарлаад бүтээн байгуулалтын ажил хийхэд цаг хугацаа болоод ихээхэн хөрөнгө мөнгөний асуудал гарах байх. Гэхдээ Засгийн газар, нийслэлийг ажлаа хийхийг иргэдийн эрүүл мэнд хүлээхгүй.

М.Санчир

Эх сурвалж: Шуурхай.мн