МАХН-ын дарга Н.Энхбаярын хамгаалагчийг өнгөрсөн баасан гаригийн өдөр баривчилсан. Энэ үйл явдалтай холбогдуулж, МАХН-ын Ерөнхий нарийн бичгийн дарга Ж.Сүхбаатар, Хэвлэл, мэдээлэл олон нийт хариуцсан дарга Б.Тулга, намын залуучуудын холбооны тэргүүн С.Буяннэмэх нар мэдээлэл хийлээ.

Тэрээр хэлэхдээ “Хамгаалагч М.Мөнхөө нилээд хүнд бэртгэл гэмтэлтэй байсан. Харамсалтай нь гэрээс нь баривчлаад явсан байна. Ингэхэд АТГ бүх л баривчилгааг баасан гаригт хийдэг болжээ. Намын санхүү хариуцсан нарийн бичгийн даргыг барьж саатуулаад гурван сар өнгөрлөө. Манай намаас өмгөөллийн асуудалд онцгой анхаарч байна. Дөрвөн жилийн өмнө дөрөвдүгээр сарын 12-13-нд шилжих шөнө Н.Энхбаяр даргыг баривчилж байсан. Ерөнхий сайд байсан хүн нь хууль хяналтын байгууллагыг тодорхой хүний захиалгаар ажиллаж байгааг онцлохдоо тэвчихээ больсон тухайгаа ч хэлсэн. МАХН төдийгүй МАХН-ын дарга Н.Энхбаярыг улс төрийн үйл ажиллагаа явуулах эрхийг хязгаарласан. Монголын өмгөөлөгчид Н.Энхбаярын хэрэг дээр ажиллахад хүнд байна, улс төрийн захиалгаар үүссэн хэрэг юм гээд өмгөөлөл үзүүлэхээс татгалзсан.” гэж онцолсон.

Ийнхүү МАХН-ын дарга Н.Энхбаярын эргэн тойрон дахь хамаатан садан, хамтран ажилладаг ойр дотны хүмүүсийг АТГ шалгаж, дарамталж эхэлжээ. Дараа нь эхнэр, хүүхдийг нь шалгах л үлдсэн бололтой.

Намын Ерөнхий нарийн бичгийн дарга  Ж.Сүхбаатарын ярьснаар намын даргын хамгаалагч амралтын өдрүүдэд Цагдан хорих 461 дүгээр байранд байж байгаад Төв аймагт цагдан  хоригдож байна. Тэгэхээр хамгаалагч М.Мөнхөөг юуны учир баривчлав гэдэг нь учир битүүлэг байна.

Тус нам АТГ болон бусад хууль хяналтын  байгууллагуудын улс төрийн хүчирхийлэл явуулж байгаатай  холбоотой өнгөрсөн долоо хоногт мэдэгдэл гаргасан. МАХН-аас Н.Энхбаяр дарга болон намын гишүүдтэй адил эрх нь зөрчигдсөн иргэдийг бүртгэн авч, нэгдэхийг уриаллаа.

Одоогоор Н.Энхбаяр дарга нь БНС-д эмчилгээ хийлгэхээр явжээ. Эх орондоо ирэх нь тодорхойгүй байгаа аж.

Б.Учирмаа

Эх сурвалж: Шуурхай.мн