Манай улсын  Засгийн газрын өр, зээлийн тухай асуудал  онцгой сэдэв болж, анхаарал татаж байгаа. Тиймээс Засгийн газар эдийн засгийн бодлогодоо эргэлт хийж  эхэлсэн.

Харин  Монголын эдийн засгийн чуулган нээлтэд  Ерөнхий сайд Ч.Сайханбилэг  үг хэлэхдээ  “..Ганц байгалийн баялаг баян улсыг бий болгохгүй нь ойлгомжтой боллоо. Өндөр технологи, хөрөнгө санхүү, мэргэшсэн инженерүүд хэрэгтэй байгаа нь тодорхой боллоо. Байгалийн баялгаа бус бусад салбараа өөд татаж, солонгоруулах хэрэгтэй нь ойлгомжтой боллоо.  Монголын эдийн засгийг ийм байдалд оруулсан чөтгөрийн тойрог биднийг мөхөлд хүргэж байна. Эдийн засгийн хямралыг давж, шинэ гарц, шийдэл олохын тулд чөтгөрийн тойргийг бид өнөөдөр тасалъя“ хэмээсэн юм. Ерөнхий сайдын хэлсэн  энэхүү үг  Монголын Засгийн газар эдийн засгийн бодлогодоо эргэлт хийж эхэлснийг баталж байгаа юм. Эдийн засгийн бодлогодоо эргэлт хийхийн тулд  юуны өмнө гадаад өрөө төлөх шаардлагатай болж байна.

2015 онд ОУВС-ын статистикийн мэдээнд дурдснаар манай улсын гадаад өр 20 гаруй тэрбум ам.долларт хүрчээ. С.Баяр, Сү.Батболд нарын Засгийн газрын үед 2012 оны хүртэлх 9.936 тэрбум ам.долларын зээл, Н.Алтанхуяг, Ч.Сайханбилэгийн Засгийн газрын үед 9.924 тэрбум ам.долларын зээл авсан дүн гарсан байна. Засгийн газарт 2008 оноос хойш эрх барьсан намууд үндсэндээ адил хэмжээний зээл авчээ.

УИХ-ын дарга З.Энхболд чуулганы нэээлтийн үеэр хэлэхдээ “Манай ард түмэн Монгол улсын Засгийн газар дааж давшгүй өрөнд баригдсан мэт буруу ойлголттой байна. Манай улсын өр байж болох түвшнээс хэтэрсэн эсэхийг дүгнэхдээ дор хаяж дараахь хүчин зүйлсийг авч үзэх ёстой. Нэгдүгээрт, бусад улсын үзүүлэлттэй харьцуулах шаардлагатай. ДНБ-д ЗГ-ын өрийн эзлэх хувиар манайхаас илүү өртэй олон арван хөгжилтэй болон хөгжиж буй орнууд байна. Хоёрдугаарт, Засгийн газрын зээлийг улс орны ирээдүйн эдийн засгийн өсөлттэй холбож авч үзэх ёстой. Өөрөөр хэлбэл, бид эдийн засгийнхаа өсөлтийг хангаж чадвал ДНБ-д эзлэх Засгийн газрын зээлийн хувь ойрын ирээдүйд түргэн буурах боломжтой. Сүүлийн жилүүдэд Засгийн газрын зээлээр дэд бүтэц, хөдөө аж ахуй, аж үйлдвэрийн салбартаа хийсэн хөрөнгө оруулалт огцом өссөн. Энэ нь эдийн засгийн ойрын ирээдүйн өсөлтийн нэгэн чухал эх үүсвэр болно. Мөн, дан ганц Оюутолгойн төсөл гэхэд л манай ДНБ-ийг 30 хувиар өсгөх тооцоо бий. Намаараа талцаж, аль нь илүү зээл авсан тухай улайран маргалдаж суух нь утгагүй. Бид урд нь авсан зээлээ нийгмийн халамжид зориулан, идэж уугаад дуусгасан нь үнэн.  Дэлхийн зах зээл дээрх нүүрсний үнэ огцом унасан. Тиймээс сүүлийн жилүүдэд эдийн засгаа өөд нь татахын тулд ухаан зарж ажиллахыг нөхцөл байдал биднээс шаардаж байна. Урд өмнөх алдаандаа дүгнэлт хийж, эдийн засгаа олон тулгууртай болгохоос өөр замгүй гэдгийг цаг үе бидэнд хүчээр ухаарууллаа

Монголын эдийн засгийн чуулган 7 дахь жилдээ хэдхэн хоногийн өмнө болж өнгөрлөө. Энэ чуулганы үеэр төр, хувийн хэвшил, төрийн бус байгууллага, иргэдийн төлөөллийг хамруулсан өргөн хүрээтэй хэлэлцүүлэг явуулсан. Энэ үеэр Монголын эдийн засгийн өнгөрсөн, одоо, ирээдүйг шүүн хэлэлцлээ. Миний бие уг чуулганд оролцож эдийн засгийн цаашдын бодлогын талаарх саналаа илэрхийлсэн.” гэсэн юм.  Эдийн засгийн долоо дахь чуулганы үеэр эдийн засгаа уул уурхайн хэт хамаарлаас сааруулах талаар онцолсон.  Тиймээс манай улсын эдийн засгийн гол суурь болсон хөдөө аж ахуйн салбартаа илүү анхаарч, хөрөнгө оруулалт хийх саналууд гарсан. Ойрын хугацаанд үйлдвэржилт, тэр дотроо боловсруулах үйлдвэрийг хөгжүүлэх бодлого явуулсны эхний үр дүн сайнаар гарч байгааг З.Энхболд дарга сануулж, дурдсан юм.

Б.УЧИРМАА

Эх  сурвалж: Шуурхай.мн