Монгол Улсын 27 дахь Ерөнхий сайд Н.Алтанхуяг өнөөдөр төрийн ордонд мэдээлэл хийлээ. Засгийн тэргүүнээс бууснаасаа хойш УИХ-ын гишүүний ажлаа хийгээд чимээгүйхэн явсан тэрбээр өнөөдөр хэвлэл мэдээллийнхэнд мэдээлэл хийж, олны анхаарлыг хормын дотор өөр рүүгээ эргүүлчихлээ.

Тэрбээр “Монголчууд маань хоёрхон сарын дараа сонголтоо хийх гэж байгаа. Маргааш УИХ-ын хаврын чуулган эхэлнэ. Ийм хариуцлагатай цаг үед би ард түмэндээ тодорхой зүйлсийг анхааруулж мэдэгдэхээс өөр аргагүй нөхцөл байдалд хүрээд байгаа юм” хэмээн яриагаа тун чиг сонирхолтой эхлүүлсэн.

Харин үргэлжлүүлээд “Өнгөрсөн хавар, намрын чуулганаар би Монголын төр үйл ажиллагаагаа хэвийн явуулж чадаж байгаа юу, УИХ-ын бие даасан байдал бодитоор байна уу үгүй юу, ер нь Монголын төрийг хэн удирдаж байна вэ гэсэн асуудлаар хаалттай хуралдаан хийж, нэг сайн ярилцаад асуудлуудаа шийдье гэж хүсэлт тавьсан боловч харамсалтай нь саналыг маань хүлээж авсангүй” гэж ирээд гомдоллож гарсан.

Энэ мэт үгсийг УИХ-ын гишүүд бүгд л хэлнэ. Харин цааш ярихдаа мань эр Монгол Улсын Ерөнхийлөгч Ц.Элбэгдоржийг “Эрүүл тулаанд” дуудчихсан. Тодруулбал “Монгол Улсын Ерөнхийлөгч Ц.Элбэгдорж болон түүнтэй үгсэн хуйвалдагч төрөөс төрсөн тэрбумтны бүлэглэл энэ мэдэгдлийн араас ашиг хонжоогоо хувааж чадахгүй байгаа найзуудтайгаа намайг хамаатуулаад, “Авлигатай тэмцэх ч амаргүй ажил юм аа. Авлигатай тэмцэх амин ажилд маань саад учруулж байна гэх мэтээр ард түмнээсээ тусламж хүсч жүжиглэнэ гэдэгт би огтхон ч эргэлзэхгүй байна” хэмээн төрийн тэргүүн рүү чиглүүлээд нумаа харвачихлаа.

Түүнчлэн “Тэд таалагдаагүй, барьцаалах боломжгүй, золиослох шаардлагатай хүмүүсээ энэ хонгилоороо ямар ч шударга ёсны хэмжүүр байхгүй зохиомол хэрэг бүхий ялтан, хэрэгтэн болгож чадаж байна. Тэд ашиглах гэсэн зарим хүмүүсийн шийдвэр гаргах эрхийг нь сүрдүүлэн, сейфэнд хийгээд барьцаалчихдаг болсон. Энэ хуйвалдагчид Монгол Улсын тусгаар тогтнолд аюул занал учруулах бүхий эрх мэдэлтэй болж хүссэн шийдвэрээ зоргоороо гаргадаг боллоо. Үүний нэг жишээ бол Шинэчлэлийн Засгийн газрыг хуйвалдан огцруулж , Засгийг хууль бусаар авснаас харагдаж байгаа юм” гэж үгээ үргэлжлүүлэв.

Энэ магадгүй Засгийн газрын тэргүүнээсээ буусан хүний гомдлын үг байж ч болох. Гэхдээ төрийн тэргүүнийг ийнхүү ил тодоор харлуулж байсан төрийн түшээ өмнө нь байгаагүй. Тэрбээр “Миний өнөөдрийн мэдэгдэл миний амь нас, ойр дотныхонд маань хэдий аюултай ч гэсэн айх зүйл алга аа. Өөртэй нь үгсэн хуйвалддаггүй, өөрийнх нь бүлэглэлд ордоггүй учраас над руу ирж байсан асар их гүтгэлэг, доромжлол, нухчин дарах ажиллагаа өнөөдрөөс бүр илүү идэвхжих нь тодорхой. Ардчиллаа хамгаалж үлдэх цаг ирсэн. Ард түмэн айдас, талцлаасаа хагацах цаг болсон. Авлигачид худлаа ярьж, нөхдөө хорьж, намаа бутаргаж, улсаа түйвээдэг цаг дууссан” гээд “Бидний монгол үүрд бадраг” хэмээн үгээ төгсгөсөн.

Харин түүний мэдэгдлийн дараахан Ерөнхийлөгч Ц.Элбэгдорж өөрийн твиттер хуудсаар дамжуулан “Алтанхуягийн мэдэгдлийг үзэв. Миний тухай ярихаас хэн ч айх учиргүй. Манай улсын давуу тал энэ юм даа. Хуулийн засаглалын төлөө хамтран ажиллая” хэмээн хариу өгсөн.

Ямартай ч эрх барьж буй намын томоохон фракцыг тэргүүлдэг, нэгэн цагт гүйцэтгэх засаглалыг тэргүүлж байсан эрхэм ийм мэдэгдэл хийж буй нь хачирхалтай үзэгдэл. Дотоод ардчилал сайтай хэмээн өөрсдийгөө тодотгодог АН-ын хувьд энэ мэт мэдэгдлүүд нь биднийг хэнд ямар хүмүүст итгэж төр бариулаад байна аа хэмээн эргэлзэхэд хүргэх юм.

“Бидний монгол үүрд бадраг” гээд байгаа хэнийх нь монгол бадраг гэж. Мэдэгдэл хийгээд тэнд айхтар мангас байна гэж яриад байгаа Н.Алтанхуягийн монгол уу, эсвэл “шударга байцгаая” уриатай ерөнхийлөгчийн монгол уу, эсвэл гуравхан сая хүн амьтай Монгол Улс уу. Төр барьж буй хэдхэн хүн, хэдхэн фракц, бүлэглэл энэ улсын хувь заяаг шийдэх гээд, хэдэн талаас нь зулгаасаар хэмлэж дуусах нь.

Нэгэн цагт засаг тэргүүлээд, эрх баригч намын тугийг өргөж явсан хүний мэдэгдэл энэ удаа тийм ч сонирхолтой байсангүй. Түүнээс хэдхэн хоногийн өмнө АН-ын нөлөө бүхий фракцын тэргүүн бас л энэ төрлийн жүжиг тоглоод амжсан. Тэрбээр сонгож болохгүй хүмүүсийн нэрсийг илчилсэн бол Н.Алтанхуяг төрхөмдөө буцах болсон Ерөнхийлөгчийг “муу хүн” болгочихлоо. Одоо түүний араас хэн гарч ирж Н.Алтанхуяг руу “чулуу шидэх” нь хэн бүхэнд сонин хэвээр үлдлээ.

Эх сурвалж: Шуурхай.мн М Санчир