Нийслэлийн Онцгой байдлын газарт өчигдөр орой 20.12 цагийн үед “Гранд плаза” төвд гал гарлаа гэсэн мэдээлэл ирсэн байна. Шуурхай дуудлагын дагуу гал унтраах 10 дугаар ангийнхан хэргийн газар очиход “Гранд плаза” төвийн хогийн сав шатаж улмаар гарааш, оффисийн хэсэг рүү утаа нь орж түрээслэгчдийг угаартуулах шахжээ. Гал сөнөөгчид шуурхай ажиллан түймрийг унтраан утааг арилгасан байна. Нийслэлийн Онцгой байдлын газрын жижүүр  “Дуудлагын дагуу шуурхай ажиллаж галыг унтраасан. Юунаас болж түймэр гарсан болон түймрээс үүдэлтэй хохирлын хэмжээг одоогоор тогтоогоогүй” гэв. Тус барилгын эргэн тойрныхон ч утаанд автаж, ойролцоох байрны оршин суугчид ч сандарчээ. Түрээслэгч нар  “Гранд плаза” төвийн  захиргаа болон ашиглалт хариуцдаг хүмүүсийн буруутай үйл ажиллагаа бидэнд дандаа чирэгдэл болдог. Байсхийгээд цахилгаан тасарна, хэзээ ирэх нь  тодорхойгүй байдаг. Түймэр гарахад хэцүүдэхээр байгаа нь сая харагдлаа” гэсэн  гомдлыг ч хэлж байна.

Эх сурвалж: Montsame.mn