УИХ дахь МАН-ын бүлгийн гишүүн Ө.Энхтүвшин өнгөрсөн долоо хоногт намынхаа зарим гишүүнийг дагуулж “Да хүрээ” захад очсон. Ингэхдээ тэнд худалдаа эрхлэгчдийг “Авто цогцолбор” руу нүүхгүй байхыг ятгаж, өмгөөлж хамгаалахаа амласан билээ. Ингэж явахдаа Нийслэлийн ИТХ-ын дарга Д.Баттулгатай ганцаарчилан уулзжээ. Харамсалтай нь ганцаарчилж уулзахдаа өнөөх “Да хүрээ”-гийн тухай цухас дурьдаад “Өгөөмөр” захын тухай нэлээдгүй ярьж, нүүлгэхгүй байх талаас нь багагүй ярьсан бололтой юм. Энэ талаар ИТХ-ын дарга Д.Баттулга “Өдрийн сонин”-нд ярилцлага өгөхдөө “…Гадаа гудамжинд буюу нийтийн эзэмшлийн талбайд автомашин худалдаалахыг зөвшөөрөхгүй. Ийм газруудыг нүүлгэе гэж байгаа юм. Ө.Энхтүвшин гишүүн “Өгөөмөр” захыг нэлээд ярьж байна лээ. Миний хувьд “Стандартад нийцсэн барилга байгууламжтай, тохилог байх юм бол нүүлгэхгүй. Харин гадаа гудамжинд худалдаа эрхэлж байгаа бол бид нүүхийг шаардаж байгаа. Ийм бодлогыг бид хэрэгжүүлнэ” гэдгийг өөрт нь хэлсэн” гэжээ.

Ө.Энхтүвшин гишүүн үнэхээр бизнес эрхлэгчдийг өмгөөлж, тэдний өмнөөс дуугарсан уу гэвэл эргэлзээтэй. Тэрбээр “Өгөөмөр” захад илүүтэй санаа зовнихоос ч аргагүй. Учир нь АТГ-т мэдүүлдэг Хөрөнгө орлогын мэдүүлэг дээрээ Ө.Энхтүвшин гишүүн “Собу” компанийн 50 хувийг эзэмшдэг гэж мэдүүлжээ. “Собу” компани нь “Өгөөмөр” захыг ажилуулдаг. 300 сая төгрөгийн дүрмийн сантай компани. Баянзүрх дүүргийн 14 дүгээр хорооны нутаг буюу “Нарантуул” худалдааны төвтэй залгаа, зам дагуу цөөнгүй жил худалдаа эрхэлж байгаа. Хөрс, усны бохирдолтой, ил задгай худалдаа эрхэлдэг гэх зэрэг зөрчил “Өгөөмөр” захаас салдаггүй. Үйлчлүүлэгчдээсээ зогсоолын мөнгө авдаг, замын түгжрэлийн шалтгаан болдог гэх зэрэг энэ захыг тойрсон хэл ам ч цөөнгүй.

Эх сурвалж: http://www.xacxom.iaac.mn/lenya/iaac/live/index/hom/hom2014.pdf

“Өгөөмөр” захад худалдаа эрхлэгчдийн төлсөн түрээсийн тал хувь нь Ө.Энхтүвшин гишүүнд очдог. Тэгэхээр эрхэм гишүүний бизнес гэж хэлэхээс аргагүй. Монголд үйлчилж байгаа Ашиг сонирхлын зөрчлөөс урьдчилан сэргийлэх тухай хуулиар төрийн өндөр албан тушаалтан, шийдвэр гаргагч өөрийнх нь эрхэлж байгаа бизнестэй холбоотой асуудлаар шийдвэр гаргахгүй, үзэл бодлоо илэрхийлэхгүй байх ёстой. Гэтэл “Өгөөмөр” захын ашгийн 50 хувийг эзэмшдэг Ө.Энхтүвшин УИХ-ын гишүүнийхээ эрх ямба, нэр төрийг ашиглаад бизнесээ хамгаалж үлдэхийн тулд иргэдийг турхирч, өмнөө барьж байна.

“Өгөөмөр” захын худалдаа эрхлэгчид “Авто худалдааны цогцолбор”-руу нүүвэл Ө.Энхтүвшин гишүүний “Собу” компани ашиггүй ажиллах нь дамжиггүй. Сонгогчдыг төлөөлдөг эрхэм гишүүн өөрийнхөө өчүүхэн эрх ашгийн төлөө нийслэлчүүдийн эрүүл, аюулгүй орчинд амьдрах эрхийн эсрэг явж байгаа нь харамсалтай.

“Авто худалдааны цогцолбор” руу нүүхийг хэн эсэргүүцдэг вэ

Нийслэлийн баруун хэсэг, “22-ын товчоо”-ны ойролцоо “Авто худалдааны цогцолбор” байгуулах асуудал гурван жилийн өмнөөс яригдсан. Нийслэлийн иргэдээс судалгаа авахад олонхи нь зам дагуу, ил задгай худалдаа эрхэлдэг авто захууд хөрс усны бохирдол үүсгэдэг, замын түгжрэлийн шалтгаан болж байна гэж хариулсан байдаг. Мөн нийслэлд үйл ажиллагаа явуулж байгаа авто захууд нийтийн эзэмшлийн талбай дээр байгаа. Хотын түгжрэлийг багасгах, агаарын бохирдлыг бууруулах, хөрс усны борхидлоос хамгаалахын тулд авто захуудыг олон улсын жишигт нийцүүлэн цогцолборт төвлөрүүлэхээр болж бүтээн байгуулалтын ажил ерөнхийдөө дуусч байгаа.

Авто машины худалдаа эрхлэгчид ч энэ шийдвэрийг дэмжиж “Авто худалдааны цогцолбор”-т газар эзэмшээд үйл ажиллагаа эхлүүлэхэд бэлэн хүлээж байгаа. Харин цөөны тооны хүмүүс нүүхгүй, хөдлөхгүй гэж тэмцдэг. Ихэнх нь “Да хүрээ” захынхан хөдлөхгүй гэдэг. Гэтэл МАН-ын Бага хурлын зарим гишүүн “Да хүрээ” захаас хувьцаа эзэмшдэг, түүнийгээ хамгаалахын тулд зохион байгуулалттайгаар иргэдийг турхирдаг гэх яриа ч бий. Энэ тухай сэтгүүлчийн асуултад ИТХ-ын дарга Д.Баттулга “Бага хурлын гишүүд нь хувьцаа эзэмшдэг юм бол энэ асуудлаа нам дотроо л ярина биз. Түүнээс биш тэр хүмүүсээ хамгаалах гэж хотын бүтээн байгуулалтын нийтлэг эрх ашгийн эсрэг явж байгаа бол намтай нь ч гэсэн ярих асуудал бий гэсэн үг. Хотоос энэ шийдвэрийг гаргахад тодорхой хүмүүсийн эрх ашиг хөндөгдөж, эсэргүүцэл ирнэ гэдгийг бид мэдэж байсан. Гэхдээ тодорхой хүмүүсийн эрх ашгаасаа илүү ард түмний эрх ашиг дээгүүр тавигдах ёстой. Нийтийн эрх ашгийн төлөө шийдвэр гаргахаас өөр замгүй. Ингэж л ажиллаж байгаа. Бидний хийж байгаагийн эсрэг хэсэг бүлэг хүмүүсийн эрх ашиг хөндөгдөж, түүнд нь намын албан тушаалтан хамааралтай байж байдаг. Энэ зүйл дээрээ иргэдийн нэрийг барина гэдэг увайгүй үйлдэл” гэж хариулжээ.

Эндээс харахад МАН-ын дарга асан Ө.Энхтүвшин, Бага хурлын зарим гишүүд бизнесээ хамгаалахын тулд иргэдийн нэрийг барьж, тэднийг турхирч байгаа ажээ.

Н.БАЯР

Эх сурвалж: http://www.legalinfo.mn/annex/details/6545