МУГЖ Т.Баясгалан, С.Жавхлан нар  санаачилсан  “Илгээлтийн эзэн” аяныхаа хүрээнд Бөхийн өргөөнд хийсэн хоёр өдрийн дөрвөн удаагийн тоглолтоос олсон орлого, тус аянд нэгдсэн Аж ахуй нэгж байгууллага, иргэдийн тусламжийн зүйлс, малын тэжээл, өвс, нэмнээ зэргийг өчигдөр ОБЕГ-т хүлээлгэн өглөө. Монгол Улсын Засгийн газартай хамтран зохион байгуулсан энэхүү аяны хүрээнд 100 гаруй тн өвс, 50000 гаруй нэмнээ, лаа шүдэнз зэрэг цугларсан байна. ОБЕГ-т хүлээлгэн өгөх арга хэмжээний үеэр МУГЖ Т.Баясгалан “Энэхүү малчдад хүрэх хандив нь тоглолтыг маань хүрэлцэн ирж үзсэн, дэмжсэн, хандив өгсөн монгол түмний минь сүү шиг цагаан сэтгэл бүрээс бүрдсэн юм шүү. Байгаль дэлхий минь уургүй номхон, уцааргүй дөлгөөн байж Монгол түмнээ үргэлж ивээж байгаасай” хэмээн онцлосон юм. Онцгой байдлын ерөнхий газрын дэд дарга, хурандаа Б.Ариунбуянгийн мэдээлснээр нийт нутаг дэвсгэрийн 20 хувь нь цастай,  дөрвөн аймгийн 10 сум цагаан зудтай, хаваржилтын нөхцөл байдал хүнд байгаа аж. Дээрх тусламжийн зүйлсийг хаваржилт хүндэрсэн  Увс, Завхан, Архангай, Сүхбаатар, Баян¬¬-Өлгий  аймгуудад хуваарилан хүргэх ажлын эхлүүлнэ гэв.  Мөн “Нэг сурагч-нэг нэмнээ” аянд нэгдсэн найман сургуулийн төлөөлөл, багш, сурагчид энэ үеэр ирж өөрсдийн хийсэн нэмнээгээ хүлээлгэн өгөв.

Unen.mn