Мэргэжлийн сүмогийн Хаврын тэмцээн Осака хотноо сүүлийн үед гараагүй өрсөлдөөнтэй явагдаж байна. Монгол аваргууд өвдөг шороодоцгоож, япон арслангууд өнгөтэй байгаа нь тэмцээний гол онцлог болж байгаа юм.
Эхний есөн өдрийн байдлаар озэки Кисэносато нэг ч унаагүй тэргүүлж, их аварга Хакүхо, озэки Гоэйдо нар найман ялалттай удаалан, араас нь хоёр унасан долоон бөх нэхэж явна. Энэ тэмцээнд түрүүлбэл ёкозүна цол хүртэж, эх орондоо 18 жилийн дараа үндэсний бөхийнх нь аваргыг буцаан авчрах хүндтэй боловч хүндхэн үүрэг хүлээсэн озэки Котошёогикү хоёр унаж, аварга болох замд нь улаан гэрэл аслаа. Ес дэх өдрийн барилдаанд түүнтэй озэки Кисэносато таарсан. Арслангууд хүчийг үзүүлэн барилдах нь уу гэтэл Кисэносато тачиай дээр мөргөлдсөнгүй, бултаж зайлаад Котошёогикүг өнхрүүлж орхилоо. Япон ёкозүна төрөх замд монгол аваргууд саад болно гэж шинжээчид үзэж байсан бол Котошёогикү япончууддаа дараалан өвдөг шороодоод байна. Барилдааны дараа Котошёогикү “Хууртсан би өөрөө буруутай ч Кисэносато хүчтэй бөх байж зайлаад байдаг нь сонин л байна. Уг нь хав барилцан үзэлцэх санаатай байлаа” гэж дургүйцлээ илэрхийлсэн. Гэхдээ Сүмогийн холбооны ерөнхийлөгч Хаккакү “Хоёр давааны зайтай байгаа ч түрүүлэх боломжоо бүрмөсөн алдаагүй. Цаашдаа хэр сайн барилдахаас бүх юм шалтгаална” хэмээн түүнийг түрүүлэхгүй үзүүрлэсэн ч ёкозүна цол олгож болох юм гэдэг санаагаа цухалзуулсан юм.

Хаврын тэмцээний үеэр их аварга Хакүход холбооноос сануулга өглөө. Тэрбээр найм дахь өдрийн барилдаанд сэкивакэ Ёшиказэг дэвжээнээс түлхэн гаргасан хойноо хөлийг нь аван, үзэгчдийн суудал руу шидэж орхисон. Дохён дээрээс “нисэн” ирсэн Ёшиказэд дарагдсан Изүцү оякатагийн зүүн хөл хугарч, гурван сар эмнэлэгт хэвтэхээр болсон байна. Холбооны тэргүүлэгч гишүүн Исэгахама ояката “Өрсөлдөгчөө ялсан хойноо нэмж түлхэх, унагаах нь ямар хор уршигтайг Хакүход  санууллаа” гэж сэтгүүлчдэд мэдээлсэн. Хакүхо ч оякатагаас уучлалт гуйж, эмнэлэгт эргэж очихоо амласан байна.

Эх сурвалж: UB LIFE.mn