Төмөр замын гэх хэрэгт холбогдуулан Х.Баттулга, А.Гансүх нарыг сэжигтнээр татан шалгаж байгаа гэх мэдээллийг өнгөрсөн удаад АТГ-аас сэтгүүлчдэд мэдээлсэн. Энэ бүхний дараа  хэд хэдэн хүнийг сэжигтнээр татан шалгасны дотор Х.Баттулгын туслах хоёр эмэгтэйн асуудал өнгөрсөн долоо хоногт хурцаар тавигдав.

Тэр дундаа хөхүүл хүүхэдтэй гэх туслах эмэгтэйчүүдийг нь саатуулан шалгаж эхэлсэн нь Х.Баттулгыг өөрийн эрхгүй шүүх танхимруу хөл алдан гүйхэд хүргэлээ. Тэрбээр “Б.Батзаяаг таван сар гаруй мөрдөнд суулгаж, тамласан. Дөрвөн залууг бид гадаадаас Монголдоо оруулж ирж чадахгүй, интерполоор хайгаад явж байна. Энэ бүгд надтай ажиллаж байсан залуус. Эрчүүдийг нь нухчиж чадахгүй болохоороо хөхүүл эмэгтэйчүүд рүү нь орж байна. Тэр туслах нарийн бичгүүдээс юу гарах юм бэ, эрх мэдэл байхгүй” гэсэн юм.

Улмаар “Тавантолгойн ордыг 60, 100 жилээр нэг компанид өгөх оролдлогыг таслан зогсоосны төлөө хамт ажиллаж байсан нөхдийг маань баривчилж, эрүү шүүлт тулгаж байна” хэмээж байв.

Тэгвэл тэрбээр энэ бүх асуудалд анхаарлаа хандуулж өгөхийг Хууль зүйн яамны сайд Д.Дорлигжаваас хүсч, албан бичиг илгээжээ.

Харин Д.Дорлигжав түүний хүсэлтийн хариулт болгож ЦЕГ, ШЕЗ, УЕПГ, Улсын Дээд шүүх зэрэгт хандаж албан бичиг илгээжээ.

Түүний албан бичгийг бүрэн эхээр нь хүргэж байна.