Хорвоод хүн болж төрсөн хэн ч гэсэн өөрийн гал боломтыг бадрааж, үрийнхээ зулай үнэрлэн амьдын жаргал эдэлсэн сайн эцэг, сайн ээж байхыг хүсдэг билээ. Гачлантай нь  зарим шинэхэн гэр бүлүүдэд үр хүүхэдтэй болж чадахгүйн зовлон нүүрлэж, үүнийг нь далимдуулан олз ашиг хайгчид олширч, тэдгээр хосуудын үртэй болох чин хүслээр тоглоом тохуу хийцгээж байна.

Эхнэр, нөхөр хоёрын аль нэг нь төрөлхийн болон олдмол үргүйдлээсээ болоод сэтгэлээр унаж, гэр бүлээ цуцлуулахад ч хүрдэг байна. Тэгвэл  ийм зовлонтой учирсан зарим нь бушуухан үр шилжүүлэн суулгуулж хүүхэдтэй болохыг хичээдэг ажээ. Хүмүүсийн энэхүү эрэлт хэрэгцээг  дагаад сүүлийн жилүүдэд үр шилжүүлэн суулгадаг эмч, эмнэлэгүүд олширч байна. Гэхдээ ийм үйлчилгээ үзүүлдэг хувийн эмнэлэгүүд нь үртэй болохын хүсэл мөрөөдөлдөө шатаж яваа залуу хосуудыг ихэвчлэн хулхидаж, амьдын там руу хаядаг болжээ.

Гэр бүл болсоноосоо  хойш хоёр жил гаруй ямагт нэг ор хөнжилд унтаж хэвтсэн хосууд өнгөрсөн намар аргаа барахдаа юунаас болоод хүүхэдтэй болохгүй байгаагаа шинжлүүлэхэд үрийн суваг битүүрсэн гэдэг онош гарсан байна. Мэс заслын аргаар үрийн сувгаа нээлгэх гэхээр Монголд тухайн үедээ ийм мэс заслын багаж хэрэгсэлгүй байсан тул зарим нь Солонгос руу явцгааж байжээ. Гэтэл тэдэнд тийшээ явах мөнгөний боломж байсангүй. Иймээс үр шилжүүлэн суулгадаг “Ануухай мед” эмнэлэгт ханджээ. Энэ эмнэлэгт тэр хоёроос өмнө нь олон хосууд очсон боловч нэлээд хэдэн нь хүссэндээ хүрч чадаагүй байв. Гэлээ ч гэсэн дүүрсэн хэрэг хэмээн тэд өөрсдийн азыг үзэхээр шийджээ. Баянгол дүүргийн зургаадугаар хорооны нутаг дэвсгэрт байрладаг тус эмнэлэгийн ерөнхий эмч О.Батсүх нь өөрийн биеэр үзлэг хийж, шинжилгээний дүнгүүдийг нь нэгтгэн харж байгаад үр шилжүүлэн суулгах мэс засал хийх бололцоотой гэсэн хариу өгсөн байна. Үүнд нь хязгааргүй баярласан эхнэр нь хамаатнуудаас хамж цуглуусан зургаан сая төгрөгөө өгөөд шууд мэс засалд орохоор болжээ. Гэтэл мэс заслын ажил “Ануухай мед”  эмнэлэгт биш  нэгдүгээр төрөх эмнэлэг буюу одоогийн “Өргөө” амаржих газрын нэг өрөөнд хийгдэнэ гэж эмч нь хэлсэн байлаа. Үүнийг нь харин залуу хосууд үнэрлэх үртэй л болж байвал хаана ч яахав хэмээн юман чинээ тоосонгүй. Тэгээд тэд эмчийнхээ товлосон өдөр “Өргөө” амаржих газар дээр мэс засалд орохоор очсон байна. Б.Баярмаа гэдэг эмч тэднийг баяртай нь аргагүй угтан авч, нөхрийг нь дагуулан явсаар хувцас сольдог өрөө юм уу гэж андуурмаар жижигхэн өрөөнд оруулаад “Энд та 30 минутын дотор үрийн шингэнэээ хийгээрэй” гээд хажууд нь жижигхэн сав тавиад гарчээ. Өөрөөр хэлбэл, эмч нь түүнд гар хангалга хийж үрийн шингэнээ гаргаж өгөхийг зөвлөсөн юмсанж. Харин эмчийг гарсаны дараа мань хүн үрийн шингэнээ садруулахаар гар хангалга хийж эхлэхийн  өмнө уг өрөөний шалан дээр хөглөрсөн хогийг хараад ялимгүй сэжиглэх аядсанч хажууугийн өрөөнд эхнэрээ тэсэн ядан хүлээж байгааг бодоод яаран сандран үрийн шингэнэээ өнөөх сав руу нь хийгээд аваачиж өгсөн байна. Удалгүй мэс заслын ажил нь ч овоо шуурхай болж өнгөрчээ.

Ийнхүү үр шилжүүлэн суулгах мэс заслаас хойш эхнэр нь хэвлийдээ бойжиж эхлэх бяцхан үрийнхээ анхны хөдөлгөөнийг мэдэрч эхлэх торгон мөчийг их л баяр баясалтайгаар хүлээж байлаа. Гэвч үр бүрэлдэж тогтсонгүй. Ингээд тэд дахиад л бөөн гуниг тээх болжээ. Эхнэр нөхөр хоёр сүүлдээ бохир заваан өрөөнд үрийн шингэнийг нь хүчээр гаргуулснаас үр тогтсонгүй хэмээн шүүхэд хандахаар шийдсэн байна. Тэдэнтэй адилхан зовлон туулж яваа Дорнод аймгийн харъяат Н.Эрдэнэ гэдэг залуу ч бас “Ануухай мед” эмнэлэгийн эмч нарт гомдол гарган Баянгол дүүргийн шүүхэд хандсан байжээ. Түүний хувьд тус эмнэлэгийн ариун цэвэр, эмчилгээний горим, стандарт хангалтгүйгээс болоод үйлчилгээ нь үр дүнгүй болсон гэдгийг Мэргэжлийн хяналтын ерөнхий газарт хэлж, энэ талаар албан ёсны дүгнэлт гаргуулахаар хөөцөлдсөн байлаа. Тэгээд “Ануухай мед” эмнэлэг нь үр шилжүүлэн суулгах албан ёсны зөвшөөрөл аваагүй байхад Эрүүл мэнд, спортын яамнаас урьдчилсан байдлаар зөвшөөрөл олгосныг олж мэджээ.

Үртэй болохын хяслан гэгчийг амсан яваа эдгээр хүмүүс гол нь О.Батсүх эмч “Манай эмнэлэг найдвартай үр шилжүүлэн суулгах үйлчилгээтэй” гэж итгүүлсэн тул зургаан сая төгрөгөө аваачид тушаагаад эцэст нь хоосон хоцорсондоо голдоо ортол гомдсон байна. Гэтэл үр шилжүүлэн суулгах мэс заслын арга нь үнэн чанартаа манай улсад дөнгөж 35 хувийн батлагаатай байгаа ажээ. Тиймээс тэдгээр хосууд бусдыг хууран мэхэлснийх нь төлөө “Ануухай мед”  эмнэлгийн ерөнхий эмч О.Батсүх мэтийн хүмүүст хуулийн хариуцлага хүлээлгэж чаддаггүй юмаа гэхэд ядаж хуурамч мэс засалд төлсөн  зургаан сая төгрөгөө буцааж авахыг хүсэх нь зүй ёсны хэрэг юм. Тэд нар шиг ингэж шүүхээр зарга үүсгэн тус эмнэлэгээс хохирлоо нэхэмжилж амжаагүй яваа нэлээд олон гэр бүл байдаг ажээ.

Б.Баяр

Эх сурвалж: Шуурхай.мн