Ерөнхий сайдыг халз мэтгэлцээнд дуудаад буй УИХ-ын гишүүн О.Баасанхүүгээс зарим зүйлийг тодрууллаа

-Та хэдхэн хоромын өмнө сэтгүүлчдэд халз мэтгэлцээнийхээ талаар мэдээлэл хийлээ. Энэ талаар яриагаа эхлүүлье?

-Намайг хоёрдугаар сарын 23-нд Ерөнхий сайд болон хэвлэл мэдээллийн байгууллагуудад хандаж халз мэтгэлцэх тухай бичиг явуулахад зарим хүмүүс надад Ч.Сайханбилэг Ерөнхий сайд ирэхгүй байх, хариу өгөхгүй дээ гээд янз бүрээр л ярьж байсан. Би тэдний ярьж буйг ойлгож байгаа. Яагаад гэвэл манай Ерөнхий сайд солигдчихсон юм уу хаашаа юм гэж бодож байгаа. Жишээлбэл, ЭМС-ын яамны үндсэн чиг үүрэг нь тэмцээ, морь, авьяас гээд өв уламжлал болсон зүйлсээ геннист оруулах ёстой байдаг. Тэр утгаараа энэ яамыг түр хариуцаж буй Шадар сайд Ц.Оюунбаатар саяын арга хэмжээнд явсан. Гэтэл Ц.Оюунбаатарыг маань тэмээн дээр суулгачихаад сонин хэвлэлээр янз бүрээр бичээд байна лээ. Би ч ойлгосонгүй. Дараа нь зурагт, твиттер харсан чинь УИХ-ын дарга “бид удахгүй геннист орох гэж байна” гээд яриад явж байна лээ. Тэгэхээр би үүнийг юу гэж ойлгож байгаа вэ гэхээр Ерөнхий сайд маань солигдчихсон юм биш биз дээ гээд гайхаад байгаа юм. Ерөнхий сайд очсон бол би ойлгоно шүү дээ. Тиймээс бичгээ зөв хүнд хаягалсан уу, буруу хүндээ хаягласан уу гэдэгтээ ч эргэлзээд л байгаа. Гэвч нэгэнт би хуульч хүн учраа хуулиа л дагаж мөрдөнө. Өөрөөр хэлбэл  Ч.Сайханбилэг гэдэг хүнийг УИХ-ын гишүүд Ерөнхий сайд гээд сонгочихсон учраас. Мөн энэ хүнийг огцруулахгүй гээд шийдчихсэн болохоор дараа дараагийн алхмаа хэлж байгаа юм.

-Тэгвэл таны дараагийн алхам юу байх бол?

Нэгдүгээр алхам нь гэвэл ямарч байсан сэтгүүлчиддээ албан ёсоор хариуг нь авч өгье. Би дуу хураагуур бариад “Халз мэтгэлцээнд оролцох уу, үгүй юу гэдгийг нь асууя”. Яагаад гэвэл тэр хүн надад хариугаа өгөхгүй, сэтгүүлчид ч асуухгүй байх шиг байна. Уг нь хэвлэлийн албаар нь дамжуулаад асуучих хэрэгтэй. Ямар ч байсан би “Та мэтгэлцэх үү” гээд асуух гэж оролдоно. Гэхдээ бүтэх үү, бүтэхгүй гэдгийг би мэдэхгүй шүү дээ. Нөгөө хүн хариулахгүй гээд суугаад байвал яах вэ. Хоёр дахь арга нь гэвэл би хоёрдугаар сарын 23-нд бичиг хүргүүлсэн юм. Хугацаа нь энэ сарын 23-нд дуусна. Хугацаа нь дуусахад надад хариу өгөөгүй учир эс үйлдлээрээ энэ хүн надад зөвшөөрсөн гэсэн хариу өгсөн гэж ойлгоно. Уг нь бид гуравдугаар сарын 12-нд мэтгэлцэхээр хугацаа заасан. Ерөнхий сайд хариу өгөөгүй учир хугацааг нь 30 хоног болгож сунгаж байгаа юм. Бидний мэтгэлцээнийг шууд дамжуулах телевиз бэлэн байна. ТВ5 телевиз эфирийн цагаасаа өгөх боломжтой гэж мэдэгдсэн. Тэгэхээр би гуравдугаар сарын 23-наас хойш телевизийн шууд эфир дээр дуудъя.

-Хариу өгөхгүй байгааг та зөвшөөрч байна гэж ойлгох юм байна. Хэрвээ таны товлосон өдөр  ирэхгүй бол яах вэ?

-Хариу өгөхгүй бол зөвшөөрч байна гэсэн үг. Тиймээс би энэ сарын 23-ны өдрөөс хойшоо энэ хүн зөвшөөрсөн шүү гэдгээ мэдэгдэнэ. Хугацаа нь тодорхойгүй байгаа учраас намайг сонго гэж байгаа юм байна гэж ойлгоод өөрөө нэг цаг товлоод телевизийн шууд эфирт Ерөнхий сайдыг урих болно. Ирэхгүй бол би тэр телевизийн эфирээр ганцаараа гараад бодлогуудаа тайлбарлана. Ийм байдлаар л ажиллах бодолтой байна даа.

Г.Лхагваа

Zaluu.com