УИХ-ын гишүүн Д.Тэрбишдавга өөрийн гэсэн хүмүүсийг дагуулан, сонгуулийн өмнө алжаалыг нь тайлахаар зугаалуулж яваа гэнэ. Шадар сайд болмогцоо Худалдан авах ажиллагааны газрын даргаар томилуулж, нэлээд хэл аманд өртөөд байсан Д.Энхжаргал, Онцгой байдлын даргаар томилуулсан Т.Дуламдорж нар энэхүү зугаалгын багт багтсан аж. Арга ч үгүй биз, тэд бол Д.Тэрбишдагвын хамгийн ойрын гэх хүмүүс юм.

Д.Тэрбишдагвын хувьд намын даргатайгаа нэлээд таарамж муудсанаасаа болоод оны өмнөхөн аягаар шидүүлж, золтой л тархиа хагалуулчихаагүй юм билээ. Үүнээсээ болоод намын дэд даргын албан тушаалаа өгнө хэмээн тунирхсан ч одоохондоо асуудал шийдэгдээгүй. Тэгээд ч МАХН-д Д.Тэрбишдагва хэрэгтэй, Д.Тэрбишдагвад ч МАХН хэрэгтэй гэдэг утгаараа хэн нь хэнийгээ орхиж чадахгүй байгаа бололтой юм.

Сонгинохайрханд дахиж гарахаасаа өнгөрсөн гэдгээ мэдэж, эртнээс өөрийн төрсөн нутаг болох Архангайд нэр дэвших бэлтгэлээ хангаад байсан Д.Тэрбишдагва гишүүн багийнхныхаа алжаалыг ийнхүү тайлж, Манжуур хотоор зугаалж байгаа гэнэ.

Д.Энхжаргалын хувьд Д.Тэрбишдагвын баруун гарын хүн бөгөөд түүнийг Шадар сайд болонгуут л Худалдан авах ажиллагааны газар гэгч асар их мөнгө эргэлддэг газрын даргаар томилогдсон. Томилогдсоныхоо дараа АТГ-т гэр бүлийн хамт шалгагдаж байгаад өөрийн хүсэлтээ албан тушаалаасаа огцорч байсан билээ.

Харин Т.Дуламдоржийн хувьд зөвлөхөөр нь ажиллаж байгаад Шадар сайд болонгуут нь Онцгой байдлын ерөнхий газрын даргаар томилогдож, Н.Алтанхуягийн Засгийн газар огцорход “Монгол шуудан” ТӨХК-ийн захиралаар томилуулах гээд чадаагүй. Түүнийг тус газрын ажилчид нь эсэргүүцэж байсан ч даргын суудалд дуртай нэгэн байсан болохоороо ч тэр үү, цонхоор нь хүртэл орж хөгөө чирч байсан удаатай.

Амарч эрч, хүчээ сэлбэж ирээд Д.Тэрбишдагвын багийнхан сонгуулийн ажилдаа шамдан орох биз ээ.

У.Жанцан

Эх сурвалж: Цензургүй.мн