–Таныг намын жагсаалтаа зараад явж байсан талаар танай намын Т Бат-Оргил жиргэсэн байна. Та энэ талаар ямар хариулт өгөх бол?

– “Намын ЕНБД жагсаалтаа зараад явж байсан” гэдэг нь намын дүрэм, холбогдох журам болон бидний эрхэмлэн эрхий хурууныхаа хээ, ургийн овог, эцэг эхийн нэр, өөрийн гараар бичсэн бичвэрээр баталгаажуулан тангараг өргөсөн “ЗА” андгайгаар ямар ч боломжгүй юм.

Мөн жагсаалтанд оруулах нэр дэвшигчдийг төлөөллийн байгууллагаараа дамжуулан санал болгодог. Жагсаалтыг ЕНБД биш төлөөллийн төв байгууллагын гишүүдийн дунд хүн нэг бүрээр нь санал хурааж, авсан саналаар нь эрэмбэлдэг зохицуулалттай. Тэгэхээр намын анхан, дунд шатны байгууллагуудаас ирсэн төлөөлөгчид буюу жагсаалтанд нэр дэвшигчдийг санал болгосон Төв Хорооны гишүүдийн дэмжсэн саналаар сонгоно гэсэн үг юм.

Т.Бат-Оргил маань намын дотоод дүрэм журам, “ЗА” андгайгаа уншиж судлахгүйгээр ийм мэдэгдэл хийгээд явж байгаад өмнөөс нь харамсаж байна.

Намын санхүүжилт бол зөвхөн манай намын бус бүх намын л шүдний өвчин. ХҮН намын хувьд намын удирдах албан тушаалтнууд Монгол улсын хууль тогтоомжийн дагуу сонгуулийн санхүүжилтийг шийдэх үүрэгтэй юм. Энэ хүрээнд Т.Бат-Оргил маань хандивын компанит ажлын төлөвлөгөөг ярилцаж байсан яриаг мушгиж байгаа байж болох юм.

ХҮН намын дүрэм журмаараа намын жагсаалт зарах эрх надад олгогдоогүй учраас би ийм зүйл ярьж явах ч боломжгүй. Энэхүү эрхэм эрх, үүрэг хариуцлага нь Намын Төв Хороонд шууд харъяалагддаг юм.

Би энэ асуудлаар дэлгэрэнгүй тайлбарыг олон нийтэд хүргэнэ.

Эх сурвалж: Шуурхай.мн