МАХН-ын дарга Н.Энхбаярын Шадар сайдад томилогдох “мөрөөдөл” талаар болж байх шиг байна. Засгийн газрын Хэрэг эрхлэх газраас явуулсан албан бичигт АТГ өчигдөр орой албан ёсоор хариу өглөө.

Тодруулбал, Засгийн газрын Хэрэг эрхлэх газраас 2016 оны 2 дугаар сарын 1-ний өдрийн ХЭГ/220 тоот бичгээр ирүүлсэн Монгол Улсын Засгийн газрын гишүүн Шадар сайдын албан тушаалд томилогдохоор нэр дэвшсэн Н.Энхбаярын хувийн ашиг сонирхлын урьдчилсан мэдүүлгийг хуульд заасны дагуу хянан үзээд, хариуг нь ийнхүү явуулжээ. Авлигатай тэмцэх газар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 23 дугаар зүйлийн 23.6-д заасны дагуу нийтийн албанд томилогдохоор нэр дэвшсэн этгээдийн хувийн ашиг сонирхлын урьдчилсан мэдүүлгийг ажлын 10 өдөрт багтаан хянан үзээд тухайн албан үүргийг хэрэгжүүлэхэд ашиг сонирхлын зөрчил үүсэх эсэх талаар томилох эрх бүхий байгууллага, албан тушаалтанд мэдэгдэх чиг үүргийг хэрэгжүүлдэг юм.

Тэгвэл эх сурвалжийн мэдээлж буйгаар АТГ-аас Н.Энхбаярыг Шадар сайдад томилж болохгүй гэсэн хариуг өгсөн байна. Энэ талаарх мэдээллийг өнөөдөр Засгийн газраас албан ёсоор мэдээлэх байх.

Ямартаа ч Ерөнхий сайд Ч.Сайханбилэг Засгийн газраа авч үлдэхийн тулд Н.Энхбаяртай хийсэн тохироондоо үнэн ч үлдэж түүнийг Шадар сайдад томилуулах шийдвэр гаргажээ. Харин АТГ-аас Н.Энхбаярыг ашиг сонирхолын зөрчилтэй хэмээн үзээд “Томилж болохгүй” гэсэн хариуг өгөв.

Ингэснээр нөхцөл байдал улам л хүндэрч орхилоо. Ерөнхий сайд энэ асуудлаар намын даргатайгаа тохиролцож чадсан ч Ерөнхийлөгчтэй хараахан тохироонд хүрч чадсангүй гэсэн таамгийг олон нийт дэвшүүлж байна. Ер нь бол Ч.Сайханбилэг “ацан шалаанд” орчихлоо. Одоо Шадар сайдар Н.Энхбаярыг томилвол хууль зөрчсөн болно. Хэрвээ түүнийг Шадар сайдад томилохгүй гэвэл Н.Энхбаяр нь эвслийг задлаад эсвэл МАН-тай тохиролцож Засгийн газрын хувь заяагаар тоглох магадлал өндөр. Ёстой нөгөө “Ордны хуйвалдаан” гэгч нь болно. Тиймээс Ерөнхий сайд энэ асуудлыг хэрхэн шийдэх нь сонирхол татаж байгаа юм.

Хэрвээ Н.Энхбаярыг Шадар сайдад томилуулахаар УИХ-руу оруулж ирвэл дэмжигдэх магадлалтай. Хэдийгээр АН-ын зарим гишүүд нь дэмжихгүй ч гэсэн МАН бүлэг дэмжинэ гэдгээ мэдэгдээ байгаа. Тэд өнгөрсөн даваа гарагт хуралдсан бүлгийн хурлаасаа “Шадар сайдад хэнийг ч оруулж ирсэн дэмжинэ” гэсэн байр суурийг илэрхийлсэн юм. Одоо харин Засгийн газар АТГ-аас явуулсан албан бичигт хэрхэн хандах вэ гэдэг л сонирхолтой байна. АТГ-ын хариуг үндэслэж хуучин хувилбар болох ЭМШУИС-ийн захирал Ц.Лхагвасүрэнг ЭМС-ын сайдад томилж, Ц.Оюунбаатарыг Шадар сайдад хэвээр нь үлдээх замыг ч сонгож болзошгүй юм.

Ямартаа ч Н.Энхбаярыг Шадар сайдад томилж болохгүй гэж хэлсээр байтал томилох уу, Засгийн газраа унагах уу гэсэн хэцүүхэн хоёр хувилбараас Ерөнхий сайд сонголтоо хийнэ. Дашрамд сонирхуулахад МАХН-ын дарга Н.Энхбаяр өөрийгөө Шадар сайдад томилогдоно гэдэгтээ бат итгэлтэй байгаа бөгөөд томилогдсон эхний өдрөө л Монгол Улсын хөгжлийн бодлогыг өргөн барьж хэлэлцүүлнэ гэж ам гараад байгаа.

Г.Лхагваа Zaluu.com