Улс төрөөс гараа татаж хэсэг хугацаанд нам гүмхэн байсан Л.Гүндалай 2016 оны сонгуулийн сургаар улс төрд эргэн ирсэн. Улс төрчидөөс хамгийн түрүүнд сонгуулийн шоугаа эхлүүлж “Ард түмнээ хайрлая” гэх сүржин нэртэй нам хүртэл байгуулаад амжсан. Л.Гүндалай эрхэмийн байгаа байдал, хэлсэн үг, хийсэн үйлдэл бүр нь олныг баясгаж, бухимдуулахыг зэрэгцүүлж байгаа гэхэд буруудахгүй. УИХ-д сонгогдохын тулд юу ч хийхээс буцахгүй улайрсан эрхэм маань дуу хүртэл дуулж клипжүүлээд авсан. Тэрээр энэ талаараа “Та бүхэндээ Өвөрмонголд хит болж байгаа, хөгжмийн зохиолч Баянгийн ая “Монголоороо байгаасай” хэмээх сайхан дууг зориулж байна. Монголчууд бидний заавал сурах ёстой дуунуудын нэг юм шүү. Та бүхэн минь сайхан шинэлээрэй” хэмээн хайртай ард түмэндээ зориулсан. Түүний уран бүтээл цацагдсан даруйдаа олон мянган хүн үзэж хандалт нь маш өндөр байгаа. Гэвч Л.Гүндалай дуу хулгайлж зөвшөөрөхгүй гэснийг хүчээр авчээ. Энэ тухай Ж.Дашдондог нэгэн хэвлэлд өгсөн ярилцлагадаа дурдсан байсан бөгөөд “Энэ дууг дуулмаар байна. Танай клипээс чиний дүрсийг авч хаяад би дуулъя гэсэн. Тэгэхэд нь зөвшөөрөөгүй. Үгүй гэдгээ хэлээд байхад л хийчихсэн байгаа байхгүй юу. Одоо миний хажууд дуучин Амараа хүртэл ирчихсэн наад асуудлыг чинь хэрхэн шийдвэрлэх вэ гээд сууж байна. Ямар ч байсан эхлээд Гүндалайтай уулзаж ярилцана” хэмээн ярьжээ. Тэгэхээр улс төрд улайран дайрч буй мань эрхэм бусдын уран бүтээлийг хулгайлсан болж таарлаа. Бусдын оюуны өмчийг хээв нэг хулгайлж чадаж байхад УИХ-д гараад их л юм хулгайлах байх гэсэн иргэдийн шүүмж тасрахгүй байна.

Эх сурвалж: Шуурхай.мн