1990-ээд оны эхээр Монгол Улс нам төвтэй төвлөрсөн тогтолцооноос ардчилал, зах зээлийн нийгэмд шилжсэнээр хүн худалдаалах, ялангуяа охид эмэгтэйчүүдийг худалдаалах гэмт хэрэг шинээр гарах болсон. Ардчилсан нийгэм иргэдэд гадаадад чөлөөтэй зорчиж сурч боловсрох, ажил хөдөлмөр эрхлэх зэрэг хувь хүний эрх, эрх чөлөөг дээдэлсэн олон сайхан боломжийг олгосон ч, нийгмийн олон сөрөг үзэгдэл гарч, шинэ төрлийн гэмт хэргүүд ихээр гарах болсон. шилжилтийн хүнд бэрх байдлаас улбаалсан ажилгүйдэл, ядуурал нь хүмүүсийг, ялангуяа хүүхэд, эмэгтэйчүүдийг улс орны дотоодод болон хилийн чанадад худалдаалах суурь шалтгаан нь болсон гэхэд буруудахгүй. Хүний наймаа нь хар тамхи, зэвсгийн наймааны дараа орохуйц ашигтай “бизнес ” учраас дэлхийн олон улс оронд газар авч байна. Манай улсад далд хэлбэрээр удаан оршин тогтнож буй эл хүний наймаачид саяхан баривчлагдсан тухай эх сурвалж мэдээллэв. Тэрээр бүлэг этгээдүүд Малайзад өндөр цалинтай ажилд оруулах нэрийдлээр тус улсын хил давуулан худалдаалдаг байсан байна. Тодруулбал, Эрүүгийн цагдаагийн газрын Зохион байгуулалттай гэмт хэрэгтэй тэмцэх хэлтэс Монгол Улсаас охид бүсгүйчүүдийг Малайз улсын Куала Лумпур хотын нэр бүхий зочид буудал, массажны газруудад аваачиж бэлгийн мөлжлөгт оруулж хүн худалдаалах гэмт хэрэг үйлдэж байсан сүлжээг илрүүлэн шалгаж эхэлжээ. Хүн худалдаалдаг этгээдүүдийг Малайз улс руу буцах үед нь баривчилсан аж. Гэмт этгээдүүд хохирогчдын тийзийг Малайз улсаас захиалан зардлыг дааж улмаар электрон тасалбарыг Монгол дахь зуучлагчаараа дамжуулан өгдөг байсан гэнэ. Охид зуучилсан ажлынхаа хөлсөнд 500000-2000000 орчим төгрөгийг авдаг байж болзошгүй хэмээн цагдаагийн байгууллага үзэж байгаа юм. Мөн өнгөрсөн оны гуравдугаар сараас хойш хүний наймаачид гурван удаагийн зуучлалаар 12 эмэгтэйг худалдаалсан байна. Хохирогчид 1983-1996 онд төрсөн эмэгтэйчүүд гэдгийг тогтоосон байна. 

Эх сурвалж: Шуурхай.мн