АН-ынхан ард түмний итгэлийг бүрмөсөн алдснаа хожуу ухаарчээ. Иргэдээсээ санал гуйж, олуулаа дахиж ялахгүйгээ мэдсэн АН-ын лидерүүд нийслэлийн мандатын тоог нэмэгдүүлэх супер арга сэджээ. Сонгуулийн хуулийг баталсны дараахан нийслэлийн ИТХ-ын дарга Д.Баттулга хүн амын төвлөрлийг харгалзан нийслэлээс сонгогдох гишүүний тоог 21 болгох хүсэлтийг УИХ-ын дарга З.Энхболдод тавьсан. Энэ санал нь байнгын хорооны босгыг даваагүй ч СЕХ-ны дэмжлэг авахаар зүтгэж байгаа ажээ. Нийслэлийн мандатын тоог нэмэгдүүлэхдээ Дорнод, Хэнтий, Увс, Ховд, Баян-Өлгий, Завхан, Баянхонгор зэрэг аймгийн мандатын тоог багасгаж, ганцхан түшээтэй болгох  магадлалтай байгаа юм. Энэ явуургүй саналыг УИХ дахь МАН-ын бүлгээс эсэргүүцэж байгаагаа мэдэгдсэн.  Тодруулбал, МАН-ын бүлгийн дарга С.Бямбацогт “Мандатын тоог тогтоохдоо нутаг дэвсгэр, засаг захиргааны нэгжийг харгалзана гэж Үндсэн хуульд болон Сонгуулийн хуульд заасан.Зөвхөн хүн амын тоог харгалзаж байгаа нь Үндсэн хуулийг зөрчинө.Энэ нь хязгаар нутаг эзгүйрэх, төвлөрөл бий болох эх үндэс болно” гэж үзэж буйгаа илэрхийлсэн. АН-ынхан яагаад гэнэтхэн нийслэлийн иргэддээ хайр зарлаад унав гэдэг нь цаанаа учир шалтгаантай. Орон нутагт дэмжлэг авахгүйгээ мэдээд нүхээ малтаж байна гэж олон хүн таамаглаж байгаа нь ор үндэсгүй хардалт биш юм.  Нутаг дэвсгэрийн бүтцээр нь харвал Монголын нийт газар нутгийн 0.3 хувь нь Улаанбаатар хотод, 99.7 хувь нь хөдөө орон нутагт оногддог. Ийм байхад нутаг дэвсгэрийн 0.3 хувьд нь 50 мандат, 99.7 хувьд нь 26 мандат ногдохоор хуваарилах санал гаргаж байгаа нь шударга явдал мөн үү.

            АН-ын эрхмүүд халуунд халж, хүйтэнд хөрдөг хөдөөгийн иргэдээ суудлын сургаар хөлдөө чирэх юм гэж үү. Нийслэлийн мандатын тоог 21 болгох санал нь АН-ын фракцийн зодоонд гал нэмснээс өөрцгүй хэрэг боллоо. Учир нь АН-ын тойргоос сонгогдсон гишүүд удирдлагуудынхаа сэдсэн супер саналыг огтхон дэмжихгүй тэрсэлдэж эхэлжээ. Ховд аймгаас сонгогдсон УИХ-ын гишүүн Д.Батцогт нийслэлийн мандатыг нэмэгдүүлбэл хязгаар нутаг төлөөлөлгүй болох учраас дэмжихгүй гэсэн байр суурьтай байна. Гэтэл АН-ын дүүргээс сонгогдсон гишүүдийг түүчээлж, Ж.Батзандан гишүүн мандатынхаа тоог нэмэхээр мачийж байгаа билээ.  Энэмэтчилэн АН-ынхан мандатнаас болж, хоорондоо зодолдох нь холгүй байна. Суудлынхаа тоог нэмж байвал Сонгуулийн хууль, Үндсэн хууль хамаагүй мэт дураараа дургих АН намынханд даруулга хэрэгтэй байна.

С.Пуужин