-Хариуцлагын тухай хуулиар далайлгаж УИХ-ын гишүүнийг эргүүлэн татна гэж сүрдүүлэх нь бүтэхгүй арга-

Монгол Улсын Ерөнхийлөгч Ц.Элбэгдорж төрийг хариуцлагатай болгох хуулийг өргөн бариад жил шахамын хугацаа өнгөрч байгаа ч энэ удаагийн парламент энэхүү хуулийг батлахгүй гэдэг нь нэгэнт тодорхой боллоо. Тус хуулийн төсөлд ажлын хариуцлага алдсан Ерөнхийлөгч, УИХ-ын дарга, дэд дарга, Ерөнхий сайд, Засгийн газрын гишүүд, аймаг, нийслэлийн Засаг дарга, аймаг, нийслэлийн Иргэдийн төлөөлөгчдийн хурлын дарга нарт хариуцлага хүлээлгэж, эргүүлэн татах тухай тусгасан. УИХ дахь АН-ын бүлэг болон УИХ-ын Төрийн байгуулалтын байнгын хорооны гишүүд ийнхүү төрийн өндөр албан тушаалтанд хариуцлага тооцож эргүүлэн татах нь Үндсэн хуультай зөрчилдөж байна үзэн энэхүү хуулийг дэмжихгүй гэдгээ мэдэгдсэн. Мөн МАН-ын гишүүд ч энэхүү хуулийн төслийг дэмжихгүй байгаа гэнэ.

Чухам ямар шалтгааны улмаас тус хуулийн төслийг дэмжихгүй байгааг УИХ-ын гишүүн Д.Дэмбэрлээс тодруулахад “Хариуцлагын хуулийг МАН бүлэг дээрээ ярьж санал солилцоогүй байна. Ер нь хариуцлагын тогтолцоог сайжруулъя, хариуцлагагүй байдлаас болж улс орны ажил цалгардаж байгаатай санал нэг байна. Хуулиа зөв гаргах нь зүйтэй. Гэхдээ хуулиа зөв гаргах гэж байна гээд хүнд ямар нэгэн ял тулгах айлган сүрдүүлэхийг хэлж байгаа юм биш шүү дээ. Би энэ асуудал их өөр байр суурьтай айдаг. Хариуцлага гэдэг бол тухайн хүний хүнд сурталыг арилгаж, алдаа дутагдлыг засах замаар хариуцлага тооцох юм. Харин манайхан хариуцлагыг арга хэмжээ авах гэж ойлгож байна. Сайдын ажил муу байна гэхээр “Сайн ажилла” гэхийн оронд огцруулна гэх саналыг гаргаад байдаг юм. Өнгөрсөн парламентад Зоригт сайдыг огцруулах саналыг гурван удаа ч оруулж ирсэн. Бид нар авч үлдэж байсан юм шүү. Хариуцлагын асуудалд ял зэмлэл тулгах байдлаар социализмийн үеийн арга хэмжээ авахаар төлөвлөх нь ардчилсан тогтолцоонд огтхон ч нийцэхгүй. УИХ-ын гишүүнийг эргүүлэн татна гэж айлган сүрдүүлж хариуцлага тооцдог арга хэлбэр уг нь нэгэнт улиран өнгөрсөн” гэх байр суурьтай байна.

Д.ЖАРГАЛ