Сүүлийн үед Үндсэн хуулийн цэцтэй холбоотой янз бүрийн мэдээлэл цацагдаж байна. Ялангуяа орон сууцны найман хувийн

зээлийг зогсоох гол шийдвэрийг ҮХЦ МАН-тай хамтарч гаргасан гэж УИХ-ын даргаас авахуулаад ярьж байгаа. Нэлээд маргаан дагуулаад буй энэ асуудал нь эцэс сүүлдээ улстөржилт болж байна гэж хэлэх гишүүд ч бий.

Үүнээс гадна Цэцийнхэнтэй холбоотой бас нэг маргаан дэгдсэн. Энэ нь ЗГХЭГ-ын дарга С.Баярцогтыг огцруулах асуудлыг хөндөхтэй зэрэгцээд УИХ-ын гишүүн Засгийн газрын гишүүнийг огцруулах асуудлыг тавьж болохгүй мэт шийдвэрийг гаргасан. Цэцийн гишүүд ЗГХЭГ-ын дарга С.Баярцогтыг өмөөрсөн шийдвэр болсон. Цэц хэний талд үйлчлээд байна вэ гэх шүүмжлэл гарч байлаа. Тухайн үед Цэцээс дорвитой тайлбар хийгээгүй. Асуудлыг тавьсан О.Баасанхүү гишүүний хувьд Цэцийн гишүүдэд бурууг тооцож, ярьж байлаа.

Цэцийн дээр зөвхөн Үндсэн хууль байх ёстой. Тийм болохоос биш хэн нэг эрх мэдэлтэн, албан тушаалтан байх учиргүй. Хуулиараа ч хориотой. Гэтэл далд байдлаар хэн нэгний эрх ашигт нийцүүлж ажиллаад байна уу гэх хардлага их гарах боллоо. Сонгууль дөхөөд ч тэр үү, олон нийтийн анхаарлыг татсан хуулийн төслүүдээр Цэц дүгнэлт гаргаж байгаа. Энэ мэт хардах, маргаан дагуулах олон асуудал бий учир Цэцийнхнээс асуумаар байна. Үндсэн хуулийн Цэцийн дээр зөвхөн Үндсэн хууль байж чадаж байна уу? гэж…

Н.Гэрэл

Bolod.mn