Улаанбаатар их дэлгүүрийн нэрийг барьж залилан үйлдэж байна. Тодруулбал, иргэн Т гэх 30 орчим настай залуу албан байгууллагуудаар явж гар дээрээс наймаа хийдэг байна. Ингэхдээ Улаанбаатар их дэлгүүрийн нэрийг барьж, тус дэлгүүрийн борлуулагч хэмээн өөрийгөө танилцуулжээ.

Хамгийн гол нь түүнд Улаанбаатар их дэлгүүрийн ажлын үнэмлэх байсан бөгөөд бүр тамга тэмдэг, гарын үсгээр баталгаажуулсан байсан нь хүмүүсийн итгэлийг төрүүлсэн бололтой.

Бидэнд ирсэн мэдээллээр тэрбээр хулхи үнэртэй ус, гоо сайхны бүтээгдэхүүнийг оригнал хэмээн зарж одоогоор хоёр иргэнийг хохироогоод  байна.  Гэвч эдгээр иргэдээс гадна хэдэн ч хүн энэ этгээдэд залилуулж хохирогч болсон байж магадгүй байгаа юм.

Удахгүй сар шинийн баяр болно. Энэ баярын үеэр хуурамч бүтээгдэхүүнүүд олширч, башир бас хялбар аргаар мөнгө ологчдын халаасыг зузаатгадаг.

Харин мэдээлэл, мэдлэг дутмагаасаа болж энгийн иргэд хохирч үлддэг билээ. Тиймээс энэ удаагийн мэдээллээ сэрэмжлүүлэг болгон хүргэж байна.

Дээрх Улаанбаатар их дэлгүүрийн нэрийг барьж залилан үйлдсэн залуугийн хувьд одоо ч тус газар ажилладаг хэмээсэн ч Улаанбаатар их дэлгүүрийн холбогдох албаны хүнээс эл залуугийн талаар  асууж тодруулахад “Манай борлуулагч гадуур юм зарж явдаггүй. Дотроо л зардаг.  Ажилчдаас гадуур худалдаа хийж явдаг хүн байхгүй. Үнэхээр манай нэрийг бариад явж байгаа бол цагдаагийн байгууллагад хандах хэрэгтэй. Ер нь манайд зарагдаж байгаа бүтээгдэхүүнүүдийн дуураймал нь маш их байдаг. Тиймээс гар дээрээс оригнал бүтээгдэхүүн зарагддаггүй гэдгийг иргэд ойлгох хэрэгтэй” гэх тайлбарыг өглөө.

Ер нь нэр бүхий дэлгүүрүүд болох Бишрэлт, Наран, Улаанбаатар их дэлгүүрийн нэрийг барьж хуурамч бүтээгдэхүүн зардаг этгээдүүд өнөөгийн нийгэмд олширсон гэхэд болно. Харин хохирсон иргэд тэр бүр цагдаагийн байгууллагад гомдол гаргаад байх нь ховор.

Гэвч энэ байдлыг өөгшүүлж, зальжин этгээдүүдийг чөлөөтэй орхих нь буруу юм. Ийм байдлаас болж дахин иргэн хохирох магадлал тун өндөр байдаг аж. Тиймээс иргэн та их, бага хэмжээгээр залилуулсан тохиолдолд заавал харьяа дүүргийнхээ цагдаагийн байгууллагад хандах ёстойг албаныхан онцолж байна.

Д.Дуулим