“Зууны мэдээ” сонины сэтгүүлч Д.Болормаа бага насны охидыг садар самуунд уруу татаж буй хэсэг этгээдийн тухай эрэн сурвалжлах нийтлэл бичих явцдаа овог, нэрийг нь сайн шалгалгүйгээс болж “Мон-Уран”-ы Б.Наранхүүг иймэрхүү төрлийн хэрэгт холбогдсон мэтээр бичсэн нь анхан шатны шүүхээр орж сэтгүүлч гэм буруугүй нь тогтоогдсон ч нэхэмжлэгчийн зүгээс Нийслэлийн шүүхэд давж заалдсанаар энэхүү хэрэг эргээд анхан шатны шүүх рүү буцахад хүрэв.

Энэ талаар МСЭ-ийн ерөнхийлөгч Б.Галаарид, өмгөөлөгч Ц.Монгол тэргүүтэй хүмүүс хэвлэлийн бага хурал хийлгэж сэтгүүлч Д.Болормаагийн эрхийг хамгаалах талаар мэдээлэл хийсэн билээ. Газрын наймаачин, “Алтжин”-гийн Г.Алтантай нэг хэсэг амьдарч байсан гэх “Мон-Уран”-ы Б.Наранхүүг Шадар сайд М.Энхболдын гарын хүн гэдэг. Тиймдээ ч МАХН-ын дарга Н.Энхбаяр  тэргүүтнийг Д.Сүхбаатарын нэрэмжит хэвлэх үйлдвэрийн хувьчлал, “Өргөө” зочид буудлын хувьчлал зэрэг асуудалд холбогдуулан эрүүгийн хэрэгт хутгах гэж санаархаж буй энэ цаг үед экс Ерөнхийлөгчийн мэдэлд байдаг “Зууны мэдээ” сонины сэтгүүлч рүү ийнхүү зогсоо зайгүй дайрч, заргалдаж буй явдал нь цаанаа улс төрийн утга агуулгатай гэж ажиглагчид үзэж байна.
Х.Балт (www.wikimon.mn)