Сүүлийн үед Дорнод аймгийн Халх гол сумын нутагт 500 мянган га талбайд Хөдөө аж ахуйн чөлөөт бүс байгуулах тухай асуудал нэлээдгүй шуугиан тариад байгаа. Хүнс хөдөө аж ахуйн сайд Р.Бурмаа энэхүү хуулийг өргөн барьж УИХ-ын нэгдсэн чуулганаар баталсан. Харин энэхүү хуулийг иргэд эрс эсэргүүцэж Халх голын сав газарт хөдөө аж ахуйн чөлөөт бүс байгуулбал эдийн засгийн үр өгөөжөөсөө илүү хохирол ихтэй байгаа бөгөөд хөдөө аж ахуйн чөлөөт бүс байгуулсан улс орон дэлхийд байдаггүй гэсэн байр суурьтай байгаа юм. Тиймээс Р.Бурмаа сайд Халх гол сумыг зорьж нутгийн зон олонтой уулзаж чөлөөт бүсийн талаар тайлбарлаж, түүний ач холбогдлын талаар ярилцаж иргэдийн санаа бодлыг өөртөө эргүүлэх гэсэн боловч хөөгдөөд буцсан.

Харин энэ тухай салбарын сайд Р.Бурмаа нэгэн хэвлэлд өгсөн ярилцлагадаа тайлбар хийж хэд хэдэн ноцтой баримтыг дэлгэсэн нь олон нийтийн анхаарлынг татаад байна. Тэрээр ярихдаа ““ХАА-н чөлөөт бус байгуулах нэрээр Р.Бурмаа сайд гаднынханд газар өгсөн байна, өгөх гэж байна” гэсэн худал мэдээлэл тарааж, иргэдийг төөрөгдүүлсэн байна. Би газар дээр нь очиж, байдалтай танилцсан нь зөв боллоо. Халх гол сум руу явснаар хэд хэдэн баримт оллоо. Тухайлбал, тус сумын өмнөх болон одоогийн Засаг дарга нар хууль бусаар нэлээдгүй га талбайг бусдад шилжүүлсэн байна. 2009 онд Засаг дарга Ц.Сүхбаатар БНСУ-ын хөрөнгө оруулалттай “Хансолмо” компанид 30 мянган га газрыг, одоогийн Засаг дарга В.Мөнхтайван Хятадын хөрөнгө оруулалттай “Соёмбо буудай” компанид 1621 га талбайг, “Үйзэн тал” компанид эхлээд долоон мянга, сүүлд 14 мянган га талбайг 7-8 удаагийн үйлдлээр өгсөн байна. Эдгээр хууль бус үйлдлийг нь аймгийнх нь удирдлагууд ч мэдэхгүй байна. Аймаг нь сумаа мэдэхээ байчихсан. Аймаг, сумын Засаг дарга, ИТХ нь ээлжилж албан тушаалд томилогдоод л, эрх мэдлээ хэтрүүлэн ашиглаад л сууцгааж байна. Хэргийг хуулийн байгууллагаар шалгуулна” хэмээн ярьжээ. Тэрээр түүний ярилцлага болоод бусад баримтыг УИХ-ын гишүүн Л.Эрдэнэчимэг твиттер хуудаснаа “Халх гол сумын Засаг дарга Солонгос, Хятадын компаниудад 15 жилийн хугацаатай газраа өгсөн булхайгаа нуужээ” хэмээн жиргэв. Чухамдаа тус аймгийн Засаг дарга газар нутгаа зарж, харин салбарын сайд нь эл булхиаг илчилж байгаа ч энэ бүхний дунд нутгийн зон олон хохирч үлдэж байгаа нь харамсалтай. Бүхэл бүтэн тусгаар тогтносон, дээрээ төртэй ард иргэд бид хэн нэгний ашиг хонжоо хайгч, мөнгөнд сохорсон мунхаг этгээдүүдээс болж газар нутгаа харийханд алдсаар байгаа нь эмгэнэл юм. Ямар ч тохиолдол төрийн түшээд та бүхэн ард түмнийхээ дуу хоолойг сонсох ёстой. Өвөг дээдсийн минь цусаа урсган байж үр хойч бидэнд үлдээсэн газар нутгийг хэн нэгэн эрх мэдэлтэн харийханд зарж худалдана гэж байж болохгүй.

Эх сурвалж: Шуурхай.мн