Өчигдөр цахим ертөнцөөр тарсан нэгэн зураг олон нийтийн бухимдлыг төрүүлээд байгаа билээ. Тэрээр “Дорнод Замын цагдаа” гэх цахим хуудсанд Монгол төрийн цагдаа хятад бичигтэй хантааз, өмсгөл өмссөн зургаа байршуулсан. Эл зургийнхаа тайлбарт “ЗАМЫН ЦАГДААГИЙН ТАСГИЙН АЛБА ХААГЧДАД ОЛГОСОН ИЖ БҮРЭН АГСАМЖ” хэмээн бичжээ. Энэхүү хятад бичигтэй өмсгөлийг олон нийт ихэд шүүмжлэлтэй хандаж байгаа бөгөөд тусгаар тогтносон Монгол улсын төрийн цагдааг доромжилж байна хэмээн үзэж буй юм. Тэгвэл энэ талаар ЦЕГ-ын хэвлэл мэдээллийн төвөөс дараах тайлбарыг өгсөн байна. “Фэйсбкүүк хуудаст дур мэдэн хятад бичигтэй хантааз өмссөн зургаа оруулсан цагдаагийн алба хаагчид Төрийн албаны тухай хуульд зааны дагуу арга хэмжээ авч байна. Энэ асуудал бол цагдаагийн байгууллагын албан ёсоор хийсэн үйлдэл биш. Хувь хүний хариуцлагагүй үйлдэл. Энэ асуудалд Дорнод аймгийн цагдаагийн газраас албаны шалгалт хийж байна” гэлээ.

Харин эл хятад бичигтэй цагдаагийн өмсгөлийг Өвөрмонголчууд манай цагдаа нарт бэлэглэсэн гэнэ. Тодруулбал, БНХАУ-ын ӨМӨЗОрны Хянган аймгийн орлогч дарга бөгөөд Дотоодыг хамгаалах товчооны дарга Жин Рүй Ган /Jin Rui Gang/-аар ахлуулсан 11 хүний бүрэлдэхүүнтэй ажлын хэсэг Дорнод аймагт урилагаар ажлын айчлал хийсэн гэнэ.  Айлчлалын хүрээнд аймгийн тамгын газар, цагдаагийн газар, прокурорын газар, гадаадын харъяат, хил хамгаалах газрын төлөөлөлтэй уулзалт зохион байгуулжээ. Улмаар тус улсын удирдлагууд гарын бэлэг болгож ийн хятад бичигтэй өмсгөл дурсгасан бөгөөд үүнийг Дорнод аймгийн замын цагдаагийн цахим хуудсанд нийтэлжээ.

Эх сурвалж:Шуурхай.мн