Нэгэнтээ иргэн Н.Энхбаярыг хүчтэй ганган явах цагт өнөөдрийн Ерөнхийлөгч Ц.Элбэгдорж “Намайг Хархорины Засаг дарга болгоод өгөөч” хэмээн гуйж явсан гэдэг. “Эр хүн туг ч барина, тугал ч хариулна” гэдэг энэ. Даанч тухайн үед Н.Энхбаяр явуулаагүй бололтой юм. Өнөөдөр үүнийг сануулж, хэлж яриад доог тохуу хийгээд байгааг бас гайхаж сууна. Н.Энхбаярын эхнэр Н.Цолмон хүртэл үүнийг ярьж бахаа хангаж байгаа бололтой.

Миний хувьд бол эсрэг бодолтой явна. Хэрвээ тухайн цагт Н.Энхбаяр Ц.Элбэгдоржийг Хархорины Засаг дарга болгочихсон бол Монголын төрд маш хэрэгтэй зүйл байв. Учир нь Ц.Элбэгдорж зүгээр нэг цэцэрхэгч, илтгэгч бус амьдралын ухаан сууж, их хаадын оршиж асан нутагт аж төрсөн өөр нэгэн байх байлаа. Ямартай ч хурал болгон дээр хоосон цаас харж худлаа бурахгүй байсан. Төрийн ажил ч арай өөр зовлон туулсан хашир хүний арга барилаар явах байлаа.

Магадгүй, доошоо орж, сумын Засаг дарга болгоод өгөөч гэж байхад нь Н.Энхбаяр  зөвшөөрсөн бол өдийд Ц.Элбэгдорж түүнийг хараан зүхээ ч билүү үгүй ч билүү. Ял авахгүй ч байж мэдэх юм. “Аяганы хариу өдөртөө агтны хариу жилдээ” гэдэг шиг Ц.Элбэгдоржийн агтны хариу арай л чанга туссан даа хөөрхий.

Гэхдээ 2000 онд навс цохиулчихсан АН-ын гишүүн өөр сонголт байгаагүй л дээ. Гэсэн хэдий ч Ц.Элбэгдорж Монгол Улсын эртний нийслэл домогт арвайн талаас дараагийн том ажиллагааг эхлүүлэх гэж байсныг Н.Энхбаяр олж хараад гацаасан ч байж болох юм. Цэцэн билэгт илтгэгч Ц.Элбэгдорж эртний нийслэл Хархорумаас мэндчилж байна гээд байхаа бас чадна. Нөгөө талаар эд нар шиг хүрээнд шигдэж улсын мөнгөнд хошуу дүрэхгүй. Хөдөө сууж амьдрал судлах хэрэгтэй. Ард түмнийхээ дунд байх нь зөв гэх мэтээр уран донгодоод амар заяаг нь үзүүлэхгүй байхаа бас чадна. Үүнд нь уруу татагдсан зарим хийтэй нөхөд аль олон хүн амтай суурин тосгонд очиж гээд дараагийн сонгуулийн кампанит ажлаа орон нутгийн төсвөөр бүрдүүлчихээ чадах л улс.

Үхэхээс бусдыг үзсэн Н.Энхбаяр энэ мэтийг бодолцсон байх учиртай. Ер нь бол Ц.Элбэгдорж бол нэг сайхан сумын засаг дарга гээд төсөөлчихөд болох л нөхөр. Хархорины Засаг дарга,аа гэж.

А.Гал