Монгол Улсын мөнгөний авдрын түлхүүрийг атгах аз нь шовойж, од нь гийсэн шинэхэн Сангийн сайд Ж.Эрдэнэбат хамгийн түрүүнд хүндэтгэлийн хадаг сүү, мялаалгын үнсэлтэд даруулж эхэлжээ. УИХ-ын гишүүн Ө.Энхтүвшингээс “Сангийн нэртэй ч сан байхгүй Сангийн яамыг авлаа. Очингуутаа өр хэд байгааг, дансанд хэдэн төгрөг байгааг ард түмэнд мэдээллээрэй. Авдар дүүрэн мөнгө өгсөн. Тэрийг Эрдэнэбат дуусгасан мэтээр ярьж магадгүй шүү. Өр тавихгүй бол болохгүй нь гээд АН-ынхны үгэнд ороод хүрээд ирэв ээ. Ийм зүйлийг хүлээж авахгүй шүү. Их хариуцлага байгааг анхааруулъя” гэх хатуухан үг сонссон ч хуралдаанд оролцсон гишүүдийн 93.1 хувийн дэмжлэгээр Сангийн сайдаар томилогдсон Сэлэнгийн унаган хүү Ж.Эрдэнэбат 16:00 цагийн үед УИХ дахь өрөөндөө орвол урьд өмнөх болон одоогийн Сэлэнгэ аймгийн дарга нар хадаг сүүтэй угтаж, “Амар байна уу, ах аа намайг бодоорой”-н энэ цагийн хувилбарыг тоглоод авчээ.

УИХ-ын чуулганд оролцохдоо сэгсэлзээд байдаггүй ч хааяа нэг жинтэйхэн дуугарчихаад сууж байдаг Ж.Эрдэнэбат гишүүнд нэг ангийхан нь төдийгүй сонгогчид ч ам сайтай байдаг юм билээ. Энэ жил Монгол Улс ойрын 25 жил хурааж үзээгүй их ургац хураан авсанд шинэхэн сайдын төрөлх нутаг Сэлэнгийн ард түмний үүрэг оролцоо шийдвэрлэх үүрэг гүйцэтгэлцсэн нь тодорхой. Тариа будааны төрөлх нутаг Сэлэнгэчүүд ийнхүү будаатай, найртай, бас шинэхэн Сангийн сайдтай болсон тул Р.Содхүүгээс эхлээд Сэлэнгийн дарга нар бултаараа ирж баяр хүргэн хошуу уралдуулцгаав.
Аливаад төдийлөн түхэлзээд байдаггүй Ж.Эрдэнэбат сайд харин нутгийн ах нараа хараад тэгсэн үү, сан байхгүй ч Сангийн сайдаар томилогдсондоо баярласандаа ч тэр үү байдгаараа инээчихсэн зогсож харагдсан. Харин Ж.Эрдэнэбат сайд маргааш өглөө Сангийн яамны санг шалгаж үзээд битгий л байдгаараа ярвайчихаасай билээ. Ядаж л өчигдрийнх нь мишээл, баяр хөөр хэдэн өдрийн настай байгаасай.

Сайхан хувцасладаг, сайхан мишээчихдэг “сайхан залуу” тодотголтой Сангийн шинэхэн сайд Ж.Эрдэнэбатын урам зоригийг Монгол Улсын сангийн авдар ёнхойж хоосон оргиод битгий л урвайлгаж, уйлуулчихаасай билээ. Харин өчигдрийнх шиг л нүүр дүүрэн мишээл тодруулж, үнсэлтэд даруулсаар байх найдлага, горьдлого байна уу, үгүй юу та минь ээ.

Эх сурвалж: