“Маск” продакшны жүжигчин М.Баярмагнайгаас дууны уран бүтээл болон шинэ цомгийнх нь талаар сонирхлоо.

-Хошин тоглолтоос гадна дуугаа орхиогүй биз дээ?

-Үгүй ээ, яалаа гэж. Дуулах нь миний хобби. Дуртай зүйлээсээ юунд уйдах билээ дээ. Тиймээс тун удахгүй шинэ цомгоо гаргах гэж байгаа. “Би дуулах дуртай-2” нэртэй энэхүү цомогт маань олон сайхан дуу багтсан. Нэлээд хэдэн дууныхаа бичлэгийг хийлгэж авсан. Бас зарим нэг дуугаа судлаад явж байна.

-Өмнөх цомогт тань хуучны дуунууд багтсан. Энэ удаагийнх нь юугаараа онцлог байх вэ?

-Миний уран бүтээл гэж юу байхав дээ. Хуучны сайхан дуунуудыг сэргээж дуулаад л цомог гаргасан хэрэг. Харин энэ удаа шинэ дуугаар баяжуулах бодолтой байна. Магадгүй, хуучны болон орчин үеийн дууг хослуулж болно. Эсвэл аль алиныг нь дагнасан хоёр цомог гаргах боломжтой. Одоогоор нэг цомгийн ажил дууссан. Дараагийн бүтээлээ хийх цаг зав, хөрөнгө мөнгө нь олдвол үзээд алдахаас буцахгүй шүү. Тэгэхээр хоёр цомгоо зэрэг гаргаж мэднэ шүү. Бэлтгэлтэй байгаарай, фэнүүдээ.

Р.ЕСҮЙ