Хошин урлагт хүч үзэж яваа залуу жүжигчид болох “Маск продакшн”-ы Гэрлээ, “Шинэ үе”-ийн Оюунтуул нар үй зайгүй найзууд. Гайхалтай нөхөрсөг хоёр андууд саяхан тааралдаж. Ойрд тааралдаагүй найз бүсгүйчүүдэд ярих дуулгах сонин содон ихтэй байсан биз.

Уулзангаа жаахан ам нь халж, өөрсдийн унаж яваа төмөр хүлгүүдээ шинжилцээд авчээ. “Шинэ үе”-ийн жүжигчин Оюунтуул буюу Туул “Маск”-ийн жүжигчин Гэрлээ анддаа унаагаа сайжруулахыг хальт сануулсан гэнэ.

Жүжигчин Туулын хувьд угаас сэргэлэн, адтай бүсгүй. Тэгтэл жүжигчин Туул найз Гэрлээ дээ өөрийн унаагаа хальт магтангаа найзынхаа төмөр хүлгийг гоочлоод авсан байх юм. Одоогоор жүжигчин Туул “томоос том” гэгчийн жипээр гангарсан шиг хотын гудамжаар хүнгэнүүлдэг гэнэ.

Харин жүжигчин Гэрлээгийн хувьд түүнийхийг бодвол нэг их томгүй хэр нь үнэ хөлсөөр шалихгүй шахам унаагаар гангардаг юм байх. Тиймээс Туул бүсгүй дотны найз Гэрлээдээ “Над шиг бай л даа” хэмээн томорсон сураг гараад авлаа.

Уг нь жүжигчин Гэрлээгийн хувьд Туул бүсгүйгээс дутах юмгүй сэргэлэн адтай л бүсгүй. Ажлаа амжуулж чадаж л байвал унах унааны том жижиг хамаагүй баймаар юм. Энэ цагийн хотын ганган бүсгүйчүүд юм юмаараа дэгжирхдэг бололтой.