Манлай уяач цолтой, Монгол түмний хайр, хүндлэлийг хүлээсэн хүчтэн А.Сүхбатын ах А.Батсүх авгай хүүхний асуудлаар шүүхийн хаалга татжээ. Өөрөө гэр бүлтэй, зургаан хүүхдийн аав энэ эрхэм нэгэн бүсгүйд хоёр үрээ орхин хөхөө шиг одсон байна. Түүгээр ч зогсохгүй хүүхдүүдээ гудамжинд гаргахаар улайран дүү А.Төгсбатын хамтаар дайрч давшилж буй юм байна. Бид түүний хоёр хүүхдийг төрүүлэн эцэстээ шүүх шүүхийн хаалга татаж аргаа барж яваа Г.Дүүрэнжаргалын ярилцлагыг та бүхэнд хүргэж байна. Арга ядсан бүсгүй нааш харах хүнгүй дээшээ тэнгэр хол, доошоо газар хатуу гэгчээр хэнд, хаана хандах учраа ч олохгүй явна.

-Тод манлай уяач А.Батсүхтэй анх яаж танилцсан бэ. Гэр бүлтэй хүний ард дахиад гэр бүл байна гэхээр итгэмээргүй юм. Хүүхдүүд чинь ч том юм байна шүү дээ. Хамт амьдарч байгаад салсан юмуу? 

-Монгол Улсын тод манлай уяач Батсүх бид хоёр 2006 онд танилцсан.  Манай ах уяач. Би ахынхаа уяан дээр очдог, моринд их хорхойтой. Тэгж байгаад л танилцсан юм. Бид  2007 онд охинтой болж, 2009 онд хүү гарсан. Хэсэг хугацаанд л хамтран амьдарсан. Цаанаа гэр бүлтэй хоёр гэрийн наана цаана гээд явдаг байсан. Би солонгост олон жил ажиллаж байгаад эх орондоо ирсэн. Надад Батсүхээс өмнө гэр бүл байгаагүй. Анх хүүхэдтэй болчихлоо гэхэд болно, бүтнэ гарга гэсээр байгаад гаргуулсан. Би ч авахуулж төвдөөгүй. Анхны хүүхэд охин байсан болохоор дараа нь хүү гаргаж өг гэж шалаад тэгээд хүү маань төрсөн.

Өөртэй чинь танилцаж байх үедээ эхнэрээсээ салчихсан байсан уу?

-Салаагүй. Ер нь бол гэр бүлтэй л байсан. Тэгсэн хэрнээ л болно, бүтнэ хүүхэд бол бурхнаас өгсөн бэлэг энээ тэрээ гээд л. Миний ч бас толгой эргэсэн байсан байх.

Тэр хүн өөрөө хэдэн хүүхэдтэй хүн бэ?

-Би таван хүүхэдтэй байхад нь танилцсан юм. Сүүлд нэг хүүхэд гараад зургаан хүүхэдтэй болсон гэж сонссон.

Гэр бүлийнх нь хүн нь та хоёрын харилцааг мэдэх үү?

-Мэдэхгүй. Саяхан өөрөө хэлсэн юм билээ. Миний талаар эхнэр нь мэдчихээд утасдаад, намайг элдэвээр хэлээд, доромжлоод л /уйлав. сурв/ Намайг дарамталдаг. Бид хоёрын дунд ийм явдал үүссэн ч гэсэн би тэр хүний нэр төрийг бодоод дуугүй байя гэж бодсон. Амаа хамхиад л. Ингэж бодсон нь миний алдаа байсан юм билээ. Би хоёр хүүхдийнхээ төлөө л ингээд яриад сууж байна. Яагаад миний хоёр хүүхэд  ийм хэцүү байдалд амьдрах ёстой гэж.  Би одоо хувиараа бизнес эрхэлдэг. Жижиг сажиг ажил чадлаараа л хийж байгаа ч үнэндээ хүч хүрэхгүй байна. Тэр хүн гэтэл огтхон ч тусалдаггүй. Хүүхдүүддээ төрсөн цагаас нь памперсыг нь ч авч өгч байгаагүй. Өөрөө бол сонин, сэтгүүл дээр мундаг сайхнаар гардаг.

-Яагаад эргээд холбогдохгүйгээр салах болов оо?

-Хоёр хүүхдээ харж үзээч, тодорхой хэрэгцээг нь анхаараач гэсэн чинь л чадахгүй гээд зугтаж эхэлсэн. Яагаад надад ингэж хандаж байгаа юм гэсэн чинь чамд ч буруу байгаа, надад ч буруу байгаа ухааны юм ярьж булзааруулаад. Би хэлсэн, өөрийг чинь өнөөдрийг хүртэл харлаа. Миний хүүхдүүдэд яг харж хандах, анхаарал халамж хэрэгтэй үе нь гээд. Тэгээд бүр болохгүй бол хуулиндаа байдаг юм байна, тэтгэлгийнх нь асуудлыг шийдэд өгчихөөч гэж хэлсэн. Тэгээд хоёулаа илүү дутуу асуудлаа болъё оо. Өөртэй чинь маргаад байх ч хэцүү юм байна гэж би зөндөө учирласан. Гэсэн ч шүүхдэхээр болсон. Тэр хүн ухамсараараа юу ч өгөхийг хүсээгүй.

-Шүүх дээр одоо асуудал ямар шатандаа явна?

-Би Баянзүрх дүүргийн шүүхэд тэтгэлгийн нэхэмжлэл гаргасан. Батсүх шүүхийнхэн шийдвэр гарчихвал би тэтгэлгийг бөөнд нь олгоно гэж хэлсэн байгаа юм. Тэгээд намайг залгахаар утсаа авахгүй, холбогдох боломжгүй. Өөрөө шүүх дээр ч ирдэггүй, нэр төрөө бодоод. Төлөөлөгч гээд өмгөөлөгч явуулчихдаг. Шүүхийн шийдвэр миний талд гараад сар гаран болж байна. Хоёр хүүхдийн маань тэтгэлгийг 18 нас хүртэл нь олгоно гэсэн шийдвэрийг шүүхээс гаргасан.

-Арай ч шүүхийн шийдвэрийг зөрчихгүй байлгүй дээ. Та бас орон байраа алдах дээрээ туллаа гэж эхэнд ярьсан. Энэ талаар тодорхой яриач?

-Сүхбат аварга өөрийн 120 мянгат дах гурван өрөө байраа Батсүх ахдаа, өөрөөр хэлбэл манай хүүхдүүдэд зориулж өгсөн юм. Тэгээд тэр байрыг нь зараад би нэг өрөө байр авсан. Үлдсэн мөнгийг нь дүү Төгсбат нь авсан юм. Гэтэл одоо Төгсбат миний амьдарч байгаа байрыг авна гээд шүүхдээд байгаа юм. Би аргаа бараад Батсүх рүү тухайн үед хэлсэн ч Төгсбат өөрийнхөө юмыг авах гэж байгаа бол би мэдэхгүй гэж хэлсэн. Би одоо хоёр хүүхэдтэйгээ гудамжинд гарахаар болоод байна. Хан-Уул дүүргийн шүүхэд Төгсбат нэхэмжлэл гаргаад намайг шүүхэд өгчихсөн байсан.

-Нэгэнт танд Сүхбат аварга байр өгсөн нь үнэн юм чинь шүүх арай ч хоёр хүүхэдтэй эрхэлсэн тодорхой ажилгүй хүнийг гудамжинд гаргахгүй байлгүй дээ?

-Шүүх миний талд шийдсэн. Батсүх хоёр хүүхэддээ энэ байрыг авч өгсөн нь үнэн юм байна аа гээд. Төгсбатыг хоёр хүний дундуур орсон гэж үзээд Хан-Уул дүүргийн шүүх миний талд шийдэж өгсөн. Гэтэл тэр давж заалдаад Нийслэлийн шүүх рүү шилжүүлсэн. Та нар ичихгүй бол би ичихгүй хэвлэлд хандана, хоёр хүүхдийн чинь яаж амьдарч байгааг олонд дэлгэнэ гэж би хэлсэн. Би хоёр хүүхдийнхээ төлөө юу ч хийхээс буцахгүй. Гэтэл Батсүх, чи хүссэнээ хий. Хийсний дараа харин би чамайг зүгээр орхихгүй гэж хэлсэн. Бүр би чиний биед халдахгүй юмаа гэхэд зүгээр орхихгүй гэж байгаа юм даа.

Итгэмжлэгдсэн өмгөөлөгч нь, одоо авгай нь мэдсэн юм чинь айхгүй гэж байна лээ гэж над руу тохуу хийж байгаа юм шиг үг чулуудсан. Би амьдралынхаа долоон жилийг ийм асуудал дунд өнгөрөөлөө. Одоо шантарч байна.

-Одоо та хүүхдүүдтэйгээ байрандаа амьдарч байна уу?

-Одоо амьдарч байна. Гэхдээ давж заалдаад миний эсрэг шийд гарчих юм бол Батсүхийн авгай залгаад байраа авья, түлхүүрээ өг гэхээр нөхцөл байдалд ороод байна. Одоо ч тэгж хөөж туугаад байдаг юм чинь. Тэгээд л би хэвлэлд хандаж байгаа юм.  Шүүхдээд ялах юм бол чамд тэтгэмжийн мөнгө, төгрөг өгнө. Тэрнээс наана би чамд сохор зоос ч өгөхгүй гэж Батсүх хэлж байсан. Тэгсэн атлаа шүүхэд надад тав, зургаан сая төгрөг өгдөг гэж сайхан сайхан юм бичээд өгсөн юм билээ. Миний энэ ярьж байгаа бүх зүйл үнэн.  Сүхбат ахынхаа хажууд тийм биш, та нар хоорондоо муудалцсан ч гэсэн хүүхдүүдийг ийм байдалд байлгаж болохгүй гэж хэлдэг.

-Уучлаарай, та анх яагаад тэр хүнтэй дотносох болов. Гэр бүлтэй гэдгийг нь мэдэж байсан байж ийм алхам хийсэн танд ч бас буруу байгаа л байх?

-Тийм мэдэж байсан. Миний ч бас алдаа байгаа л даа. Одоогоос хоёр, гурван жилийн өмнө Дарханд хүрээд ир, энд байр авчлаа, сайхан амьдарья гэж хэлж байсан. Тэр үед би яваагүй. Тэр хүн ч гэсэн над шиг сэтгэл нь хөдлөөд л хамтдаа тодорхой хугацааг өнгөрөөсөн байлгүй дээ.

-Ар гэрийнхэн чинь энэ асуудлыг яаж хүлээж авч байна. Та түрүүнд уяач ахынхаа тухай яриад орхисон?  

-Тод манлай уяач Онон манай хамаатан. Жил болгон наадмын талбай дээр Батсүх манай ахынхтай хаяа дэрлээд бууж байгаа. Тэгээд би цагаан сараар очихдоо ийм болоод байгааг Онон ахад хэлсэн, их гайхсан байдалтай хүлээж авсан. Манай гэрийнхэн намайг өөрөө л асуудлаа шийд гэдэг. Төгсбат нэртэйгээр нь ерөнхийлөгчид хэлээч гэж намайг доог тохуу болгосон. Өөрөө ах нарынхаа арын албанд зараалд явдаг тодорхой ажилгүй хүн байгаа юм. Адилхан эрхэлсэн ажилгүй, байр суурьгүй байж чадлаа эм хүнд гаргаж байгаад нь би гомдолтой байгаа.

-Батсүхийн ээж нь таныг мэдэх үү. Мэдээж энэ олон жил болоход анзаарсан байж таараа?

-Батсүхийг гэрийнхэн нь Тангаа гэдэг, ээж нь Тангаагийн хүүхэд чинь долоо болчихсон уу гэж нэг удаа асууж байсан гэсэн. Ээж нь юу ч хэлдэггүй. Нэг удаа цагаан сараар хүүхдүүдээ эмээ дээр нь авч очиж байсан. Мөөеө мөөеө гээд манай хүүг өхөөрдөөд л. Манай хүү бөхөд их дуртай. Батсүхийг ч гэсэн гэрийнхэн нь барилдуулах сонирхолтой байсан юм билээ. Баянзүрх дүүргийн шүүх дээр хэлж байгаа юм л даа. Энэ хүн морь уядаг, энэ их мөнгө нь хаанаас гаргадаг юм гэж. Батсүх хэдэн ээлжийн машин, орон сууцтай. Хоёр хүүхдийнхээ тэтгэлгийг нь тогтоолгоод хэл амгүй өгчих болов уу гэж би энэ хүнийг удаан харлаа.

Миний хоёр хүүхэд хэцүү тарчиг байдалтай байна, эцэг нь боломжийн амьдарч байгаа мөртлөө. Би ганц эмэгтэй хүн тэр болгон хүрэлцэхгүй байна. Томоо сургуульд зөөнө, бага маань цэцэрлэгийн насных. Хүүдээ цэцэрлэгт явуулах гэсэн юм гэсэн чинь, чи хөнжлийнхөө хэрээр хөлөө жий л дээ гэж хэлсэн. Арай ч тэгж хэлж болмооргүй юм. Батсүх саяхан хүртэл утасны ярианы төлбөр сард 300 мянга гардаг, хэдэн азарга адуутай гэж ирээд ярилцлага өгсөн байсан. Тийм хангалуун хүний ард төрсөн хоёр үр нь бүлтийтлээ хараад сууж байхад тоохгүй, бүр гудамжинд гаргах нь. Би маш их цөхөрч бас шантарч байна.

Ярилцсан У.ЦАХИРМАА