Өнгөрсөн пүрэв гарагт улстөрийн амьдралд нэгэн дуулиан өрнөсөн нь Ерөн­хийлөгч Ц.Элбэгдорж “Женко” Х.Баттулгыг өрөөн­дөө дуудаж уулзсан, хэний ч таамаглаагүй ба­раалхалт байв.

Үйлдвэр, хөдөө аж ахуйн сайдын суудлаа сайн дураараа ширвэсэн “Женко” нэгэн цагт өстөн дайсан шахуу явсан найруулагч Го.Бадарчтай хамтран “100 чухал сэдэв” хэмээх захиалгат нэвтрүүлэг хийж, урагшаа чиглэсэн нарийн төмөр зам тавихыг дэмжигчдийг “Эрлийз үү, хурлийз уу” хэмээн баахан цусны шинжилгээ хийгээтэхсэн биш Ерөнхийлөгчийн эгдүүг хүргэж “Телевизийн дэлгэц, айлын хойморт цус шинжлээд сууж болохгүй” хэмээн зэмлүүлээд авсан.

Ерөнхийлөгчийн “Жен­ко”-г буруутгасан гол асуудал нь 2010 оны зургаадугаар сарын 24-ний өдөр УИХ-ын 32 дугаар тогтоолоор баталсан Тө­рөөс төмөр замын талаар баримтлах бодлого байсан нь ойлгомжтой. Ерөнхийлөгч Ц.Элбэгдорж “Төмөр замын бодлогын хувьд Монгол Улс бодлоготой. Энэ асуудлыг өөрөө салбарыг нь хариуцаж байсан сайдын хувьд мэ­дэж байх ёстой. Өөрт чинь бүх боломж байсан гэд­гийг хэлэх хэрэгтэй. Хэ­дэн газрын зураг үзүүлж, эвлүүлэг хийгээд асуудал шийдэхгүй. Бид зөвхөн урд хөрш рүү ачаагаа зөөх гээд байгаа юм биш. Гурав дахь хөрш рүү дамжуулан гаргах бодлого ч бий. Ямар улс руу гаргаж байна тэр улсынхаа царигийг л тавина гэсэн үг” хэмээсэн нь “Баттулга аа урагшаа нарийн царигтай төмөр зам тавина ойлгов уу. Өөр асуудал байхгүй, гүйцээ” гэсэнтэй агаар нэгэн юм. Хачирхалтай нь энэхүү халуухан ярилцлагын үеэр “Женко” ганц үг амнаасаа унагалгүй, шазуур зууж суусаар байгаад гарсан билээ.

Хэдийгээр Ц.Элбэгдоржоос хатуухан үг дуулсан ч “Женко” тийм ч амархан буу­гаад өгөхгүй нь тодорхой. Чин ван Ханддоржийн нэгэн цагт айлдсан “Жанчхүүгийн даваанаас нааш хятад шаа­хайны мөрийг бүү гарга” гэсэн хилэнт үг өнөөдөр монгол хүн бүрийн цээжинд улам л хүчтэй лугших бол­сон нь Х.Баттулгын барь­цаа лавшруулах хамгаас хүчирхэг дэмжлэг гэдгийг эрх баригчид ч, Ц.Элбэгдорж ч хамгийн сайн ойлгож байгаа учир түүнд үүнээс илүү хатуурхаж чадахгүй. Хатуурхаад ч наадах нь дөнгөж сая сургуулийн ширээнээс боссон юм үзээгүй шалдан банди биш болохоор ёстой л “Нэг чихээрээ сонсоод, нөгөө чихээрээ гаргах” нь ойлгомжтой. Бүтэн 30 минут хар цагаан дуугүй лүглийж суусаар Ц.Элбэгдоржийн өрөөнөөс гарсан тэрээр тэр оройдоо л “Хөршөө мууллаа л гэх юм. Түүхээ л ярьсан даа уг нь. Түүхээ мартах юм уу, тэгээд” хэмээн жиргэсэн нь Ц.Элбэгдоржийн хатуур­хал түүнийг тэгтлээ айлгаа­гүйгээр барахгүй, тийм ч амархан бууж өгөхгүй гэд­гийг нь илэрхийлсэн хэрэг болов уу. Тэрбээр нэгэнт л эргэн тойронд нь язганалдаж байгаа “Бууны нохойнууд”-аас эгнэгт хөндийрөхөөр эргэлт буцалтгүй шийдсэн тул түүнийг хэн нэг Дорж, Дамба шиг өшиглөөд хөө­чихнө гэж байхгүй. Тэгээд ч “Зөв нь буруугаа дийлж, зөөлөн нь хатуугаа элээнэ” хэмээн монголчууд төдийгөөс өдий хүртэл зүгээр ч нэг хэлэлцсээр ирсэн хэрэг биш билээ.

Давхар дээлээ өөрийн хүс­лээр тайлж Үйлдвэр, хөдөө аж ахуйн сайдын сэн­тийгээс буугаад удаагүй байгаа УИХ-ын гишүүн Х.Баттулга сайдын алба хаш­сан сүүлийн сарууддаа Засгийн газрын хуралдаанд суухаа больж, “Юу бүтээнэ гэж тэр завхарсан хуралд суух вэ” гэчихээд Баянгол зочид буудалдаа ихэнх цагийг өнгөрүүлдэг байсан. Энэ талаар нь ч түүнтэй байнга сөргөөцөлдөж байдаг УИХ-ын гишүүн Ц.Нямдорж “Х.Баттулга аа чи төрийн ажил хийхгүй бол, чаддаг хүнд нь өг” хэмээн байн­га л дайрдаг байв. Тэгвэл Х.Баттулга гэдэг улстөрч юу бодож, юу хүсч мөрөө­дөж явдгаа дуулиант нэвт­рүүлгээрээ товч тодорхой илэрхийлчихсэн.

Монголын Уул уурхайн Үндэсний ассоциацийн Ерөн­хийлөгч гэгдэх Д.Дамба гэх нөхрийн Монголын га­­зар нутаг, байгалийн баял­гийг Хятад руу хараа хя­налтгүй зөөж, газар нутгаа ч түрээслүүлэх маягийн гео­политик ярьсан цэцэрхэлд илт дургүйцэж “Би явлаа. Ийм бууны нохойнуудтай юу ярьдаг юм” хэмээгээд хаалгаа гаднаас нь хаачихаад явах зоригтой байсных нь төлөө түүнд талархагсад улам л олширно уу гэхээс хорогдохгүй болсон нь ч үнэн. Ерөнхийдөө Монголын төрийг бууны нохойнуудаас цэвэрлэх Х.Баттулга гэдэг улстөрч цаг үеийн шаард­лагаар тодорч байж ч болзошгүй.

Улс оронд хэрэгтэй цаг тул­гарсан үед жинхэнэ эх орончид төрөн гардаг нь амьдралаар батлагдсан үнэн. “Женко”-гийн тухайд нэг иймэрхүү. Тэгвэл Эдийн зас­гийн хөгжлийн яамны Төрийн нарийн бичгийн дарга Б.Шинэбаатарын өрөөнд таг­нах, чагнах төхөөрөмж тавьсантай холбогдуулан Н.Батбаяр сайд тун ч цу­халдуу яваа дуулдсан. Сүүлд авсан мэдээгээр “Би ингэж олон хүний шүдэнд орсон мах, нүдэнд орсон хог болж явахаар энэ сайдынх нь албыг өгчихсөн ч яадаг юм” гэж яваа сурагтай. Түүний асуудлыг авч хэлэлцэх байсан УИХ-ын чуулганаас АН дахин завсарлага авснаар “Фортуна” сайд магадгүй Эдийн засгийн хөгжлийн сайдын хувиар сүүлийн долоо хоногийн ажлаа хийж явж мэдэх л юм.

Ямартай ч өнгөрсөн до­лоо хоногийн сүүлчээр Мон­голын улстөрд иймэрхүү хоёр дуулиан дэгдээд өнгөр­сөн. Харин цаашаа хэрхэн өрнөхийг чухамхүү цаг ху­гацаа л харуулах бизээ.

Д.Түвшин

Эх сурвалж: