Шүүхийн шийдвэр гүй­­цэтгэх ерөнхий газрын харьяа 461 дүгээр хорих ангийн Ерөн­хий эмч, ахлах дэслэгч Б.Дарханбат “Амарсайханд эмчилээ хийж болохгүй гэсэн чиг үүрэг дээрээс өг­сөн” гэж талийгаачийн ар гэрийн­хэнд хэлсэн бай­даг. Талийгаачийн ар гэр “Га­даад дотоодын эмнэлгийн байнгын эмчилгээ, асаргаа, хяналтад байдаг наад хү­ний чинь амь нас дээсэн дөрөөн дээр байна” гэхэд ийм хариулт өгсөн байх юм. Д.Амарсайханы эрүүл мэнд муу байгаа гэдгийг эмч битгий хэл жирийн хүн ч ойлгохоор нарийн мэргэж­лийн эмч нарын дүгнэлт, өвчтний түүхийг өмгөөлөгч нь өгчээ. Ийм дүгнэлт байсаар байтал 461 дүгээр ангийн эмч нарт татгалзах ямар шалтгаан байсан юм бэ. Талийгаачийг эмчлэхгүй байх, “үхүүлэх” сонирхол хуулийнханд байсан гэмээр.
АТГ-ын зүгээс Газрын тосны газрын дарга асан Д.Амарсайханыг батлан даалтад гарган гадуур бай­­цаасан байдаг аж. Тэгээд хэргийг нь шүүхэд шил­жүүлсэн байна. Хан-Уул дүүргийн Ерөнхий шүүг­чийн үүрэг гүйцэтгэгч Ё.Цогтзандан цагдан хорих шийдвэр гаргахдаа “Цагдан хорих461 дүгээр хорих дотроо эмнэлэгтэй. Тэнд эмчлүүлэх боломжтой” гэсэн хариуг өмгөөлөгчид өгсөн байдаг.
Ингээд цагдан хо­ригдсон Д.Амарсайхан өмгөө­лөг­чөөрөө дамжуулан 461 дү­гээр хорих ангийн эмнэлэгт хэвтэх хүсэлтээ илэрхийлж эхэлсэн ч “Боломжгүй” гэ­сэн хариу авч байжээ.
Хөл дээрээ тогтож чадахгүй, өвчиндөө шаналсан тэрээр уулзалтын өрөөнд ухаан алдсан. Хорих ангийн эмч нар тариа хийгээд яаралтай түргэн тусламжийн 103 дууд­­сан байдаг. Тэр 103 нь цагийн дараа очсон юм билээ. Уг нь “Цагдан хорих ангийн эмнэлэг өөрийн унаагаар эмнэлэгт хүргэнэ” гэсэн дотоод журамтай.
Гэтэл яагаад 103 дуудаж цаг алдав гэсэн асуулт гарч ирнэ. Баянгол дүүргийн цагдаа прокурор, эмч нар зад­лан хийсэн бөгөөд өнөөдрөөс эхлэн Эрүүл мэндийн яам, Хууль зүйн яамны хам­тарсан ажлын хэсэг эд эсийн шинжилгээ хийх аж. “Биеийн байдал муу” гэсэн талийгаачийн хүсэлтийг үл тоон эмчлэхээс татгалзсан 461 дүгээр хорих ангийн Ерөнхий эмч Б.Дарханбатад эрүүгийн хэрэг үүсгэжээ.

Т.Эрдэнэ
Эх сурвалж: