Нэгэнт Монгол Улс цаазаар авах ялыг халчихсан болохоор алуурчин хэдэн ч хүнийг зэрлэгээр хороох болжээ

Баянзүрх дүүргийн IX хорооны нутаг дэвсгэрт энэ сарын 7-нд шилжих шөнө 19-20 насны хоёр охины амь насыг онц хэрцгийгээр хө­нөөсөн хэрэг гарсан.

Талийгаачдын цогцсыг хэрэг гарснаас хойш нэг хо­ногийн дараа буюу энэ са­рын 8-нд тус дүүргийн Хар хошуу гэх уулнаас олсон байна.

Тодруулбал алуурчин тэднийг хө­нөөс­нийхөө да­раа нэгнийх нь толгойг бие­нээс нь салгаж, нөгөө­гийнх нь нүүрийг хүн та­нихын аргагүй болтол нь зэрэмдэглээд цогцсуудыг уулын орой дээр овооны ха­жууханд чулуугаар бул­сан байжээ.

Хар хошуу уулын ойр хавийн иргэд айдаст автжээ

Манай сурвалжлах хэсэг өчиг­дөр хэргийн газрыг зорь­сон юм. Охидын амийг нь хө­нөөсөн газар болох Баян­зүрх дүүргийн IX хороо, Шар хадны эцсийн буудалд ирлээ. Эцсийн буудлаас цааш 300 орчим метрийн зайд Хар хошуу уул харагдах аж.
Оршин суугчдын ярьж байгаагаар энд арван хэ­дэн жилийн өмнө ганц, хоёрхон хашаа хатгаастай байсан байна. Гэтэл жилээс жилд иргэд хаяа дэрлэн буу­саар эдүгээ бүхэл бүтэн хороолол бий болжээ.

Ха­рин талийгаач охидын зэ­рэмдэглэсэн цог­цос олд­сон Хар хошуу уул хэ­зээний догшин лус сав­дагтай гэнэ. Учир нь энэхүү ууланд их хэлмэгдүүлэлтийн үед лам нарыг олноор нь авч ирж буудаж хороодог байжээ.
Манай сурвалжлах баг явсаар уулын орой дээр гарлаа. Талийгаач охи­дын цогцсыг булсан газарт ирэхэд хадаг яндар болсон овооны хажуу талыг ухаад хаячихсан байв.

Иргэд ухсан нүхийг бу­лах аядаж, арц хүж уугуул­сан болол­той. Овооноос доо­­­ш 50 хү­рэхгүй метр алхаад айлын хашаа тулах аж. Хэдий тийм ч тэрүүхэн хавьд эзэнгүй байшин, гэр байна уу гэлтэй ганц ч хүн харагдахгүй нэг л эл хуль. Гадны хүнд уулын салхи хүртэл хүнийрхэж, хүйтэн хөн­дий санагдаж байхад ийм аймшигт хэрэг гарсны дараа иргэд ихээхэн айдас, түгшүүртэй амьдарч байгаа нь лавтай.

Үүнийг батлах шиг “Бурхан минь, шөнө оройн цагаар эмэг­тэй хүн ганцаараа ява­хад аюултай болж. Хэн яаж ч мэдэх нь” гэж ярих хүн олон таарав.

Иргэд энэхүү аймшигт хэргийн талаар “Яаж ч бод­сон энэ хэргийг ганц хүн үйлд­сэн гэхэд итгэмээргүй. Хэчнээн архи ууж сог­­туурсан байлаа ч үе тэн­­гийн­хээ хоёр охиныг хө­нөөж, нэгнийх нь тол­гойг биенээс нь салгаж, нөгөөгийнх нь нүүрийг хүн танихын аргагүй болгоно гэдэг боломжгүй” гэж ярьж байлаа.

Түүнчлэн та­лийгаачдын нэгнийх нь толгойг уулын хойд энгэрт байх айлын жорлонгоос ол­сон тухай ч хэлж байв.

Хохирогчид амиа алдахаасаа өмнө “Давсны булаг” дэлгүүрээр үйлчлүүлжээ

Бидэнд олдсон мэдээл­лээр хэрэг гардаг өдөр талийгаач Б, Х болон сэжигтэн И нар хотын тө­вийн нэгэн бааранд архи­дан согтуурчээ. Улмаар энэ сарын 7-нд шилжих шөнө 00:00 цагийн үед хэрэг гарсан газар болох Баянзүрх дүүргийн есдүгээр хороонд байрлах сэжигтэн З-гийнд ирж хоол идсэн байна.

Ингээд сэжигтэн И гэгч хохирогч Б, Х нарыг дагуулан гарч, Баянзүрх дүүргийн есдүгээр хороо Хар хошуу гэх нэртэй ууланд дахин архи ууцгаажээ. Ин­гэхдээ уг архиа уулын ойролцоо үйл ажиллагаагаа явуулдаг “Давсны булаг” гэх дэл­гүүрээс худалдаж авсан байна.

Төд удалгүй тэд хоо­рондоо маргалдаж, улмаар хохи­рогчдын амь насыг онц хэрцгийгээр хөнөөсөн бо­лох нь сэжигтэн И-гийн мэдүүлэг, хэргийн газраас олд­сон эд мөрийн баримтаар тогтоогдсон аж. Хохирогч, сэжигтэн нар нь өмнө нь бие биенээ таньдаггүй байсан бөгөөд сэжигтэн З-гээр дамжуулж хэрэг болдог өдөр танилцсан болох нь мөрдөн байцаалтын явцад илэрчээ.
Бид буцах замдаа “Давсны булаг” дэлгүүрийн худал­­дагч­­тай уулзаж хэр­гийн та­лаар тодруулах гэсэн ч “Цагдаа нар ирээд камерийн бичлэг үзээд явсан. Мөр­дөн байцаалт явагдаж бай­гаа болохоор ямар нэгэн мэдээ­лэл өгч болохгүй гэж хэлсэн” гээд мэдээлэл өгө­хөөс татгалзсан юм.

Хэргийн газарт гурван удаа үзлэг хийжээ

Энэхүү аймшигт хэрэг гарсан талаар цагдаагийнхан энэ сарын 8-ны 20:00 цагийн үед дуудлага авчээ.
Ингээд гэмт этгээдүүдийг эрэн сурвалжилж эхэлсэн байна. Хэргийн газрын үзлэгийг нийт гурван удаа хийж эд мөрийн баримтаар 61 эд зүйлийг баримт­жуулан авч, хэргийн мате­риалд хавсар­гажээ. Ингээд хохирогчид болон сэжигтэн нарыг хэн болохыг нь тог­тоосон байна.

Хохирогч Б нь 1994 онд төрсөн, Өвөрхангай айм­гийн харьяат. Баянзүрх дүүр­­гийн 19 дүгээр хороонд ор­шин суудаг, бүрэн дунд боловс­ролтой, тодорхой эрхэлсэн ажилгүй. Хохирогч Х нь мөн л бүрэн дунд боловс­ролтой, то­дорхой эрхэлсэн ажилгүй. 1994 онд Ховд аймагт төр­жээ.

Сэжигтэн И нь 1991 онд төрсөн, Өвөрхангай аймгийн харьяат, мэргэжилгүй, то­дорхой эрхэлсэн ажилгүй. Өнгөрсөн 2012 оны тавдугаар сарын 30-нд Сонгинохайрхан дүүргийн шүүхээс нэг сарын баривчлах ялаар шийтгүүлж байжээ.

Харин сэжигтэн З нь 1990 онд төрсөн. Баянзүрх дүүргийн 20 дугаар хороонд оршин суудаг, эрхэлсэн то­дорхой ажилгүй нэгэн аж.
Одоогоор эл хэрэгт И, З нарыг сэжигтнээр тооцон ШШГЕГ-ын харьяа Цагдан хорих 461 дүгээр ангид саатуулаад байгаа аж.
Ха­рин нэг хохирогчийнх нь толгой өнөөг хэр нь ол­­доо­гүй байгаа талаар цаг­даа­гийн байгууллагаас хэлж байна.

Нэгэнт Монгол Улс цаазаар авах ялыг халчихсан болохоор алуурчин хэдэн ч хүнийг зэрлэгээр хороосон дээд тал нь 25 жилийн ял авч байна.

Б.Төрбат

Эх сурвалж: