Малайзын Куала Лампур хотоос Бээжин рүү ниссэн Малайзын агаарын тээврийн “Boeing 777-200” онгоц өчигдөр 02.40 цагийн үед холбоо тасарч, сураггүй болсон талаар бид мэдээлсэн билээ. Тодруулбал, 239 зорчигчтой явсан тус агаарын хөлөг өчигдөр өглөөний 06.30 цагт Бээжинд газардах хуваарьтай байсан боловч Вьетнамын бүс нутаг дахь агаарын орон зайд нисэж байхдаа холбоо тасарсан юм. Удалгүй Вьетнамын зүгээс энэхүү онгоцыг тэнгист унасан гэдгийг мэдээлсэн ч Малайзын албаныхан үүнийг үгүйсгэн, онгоц осолдсон гэх ямар нэгэн нотолгоо олдоогүй болохыг онцолсон юм.

Түүнчлэн энэхүү нөхцөл байдалтай холбоотойгоор Малайз болон Вьетнам, БНХАУ-ын холбогдох албаныхан эрэн хайх ажиллагааг эхлүүлсэн.

Тус агаарын хөлөгт  239 зорчигч, нисэх багийн 12 гишүүн байжээ. Тодруулбал, Хятад болон Тайваны 153, Малайзын 38, Индонезийн 7, Австралийн 6,  Энэтхэгийн 5, Францын 3 иргэн зэрэг нийт 14 улсын зорчигч байсан талаар тус улсын агаарын тээврийн албанаас мэдээлжээ.

Онгоцны зорчигчдын жагсаалтанд учир битүүлэг хоёр иргэн байгаа болохыг тус улсын холбогдох албанаас мэдээллээ. Тодруулбал, дээрх хоёр зорчигчийн тухайд Итали, Австралийн хоёр иргэний хулгайд алдагдсан паспортоор тус онгоцонд суусан нь тогтоогдоод байгаа юм байна.

Одоогоор тэд чухам аль улсын иргэн болох нь  тодорхойгүй байгаа гэнэ. Энэ тухай өчигдөр Малайзад паспортоо алдсан Италийн иргэн Luigi Maraldi-ын аав “Энэ золгүй явдлын дараа хүү маань утсаар холбогдсон. Миний хүү аялалаа Малайзад үргэлжлүүлж яваа бөгөөд гурван долоо хоногийн дараа ирнэ” гэж мэдээлжээ. Харин Австалийн иргэний тухай Австралийн гадаад явдлын яамны албаны хүний мэдээлснээр тус улсын иргэн А нь 2012 онд Тайландад паспортаа гээсэн бөгөөд өдгөө энэхүү онгоцоор зорчоогүй болохыг мэдээлжээ.

Одоогоор сураг алдарсан онгоцны эрлийн ажил үргэжилж байгаа юм.

Г.Даша