Ямар нэг хууль журам хэн хэндээ тэгш шударга үйлчилж байх ёстой. Ингэхгүй байж гэмээнэ л хэрүүл маргаан, баян хоосны ялгаа, барьцалт, талцалт гардаг нь бичигдээгүй хууль. Яг энэ хууль замын нэгдүгээр эгнээнд буй машиныг ачих ажил дээр тодхон хэрэгжиж байна.

Машин зогсчих олигтой талбай, зогсоолгүй нийслэлд нэгдүгээр эгнээнд машинаа тавихаас өөр аргагүй нөхцөл байдал олон газар л үүсдэг. Саяхан хэнэггүй эцэг эхийн гайгаар хоёр сартай хүүхдийг машин журамлагчид чирээд давхисныг бодохоор гол харлах юм.

Энэ мэт олон тохиолдол байгааг холбогдох албаныхан хэлснийг энд бас дурдая. Түүнээс гадна нэгдүгээр эгнээнд тавьсан машиныг ачдаг зөвшөөрөл авсан нэртэй мөнгө хөөсөн оффисгүй компани байгааг бас дуулгая. Тэгэхээр одоо бүр машин ачих нь бизнес болчихоод байгааг олон баримтаас харж болохоор байна.

Сүүлдээ машин журамлагчид өдрийн нормоо биелүүлж байгаа аятай өрөөсөн талд нь нуугдаад зогсчихсон, нэг машин тавилаа л бол эзнийг нь далд орохыг хүлээж байгаад ачаад явчихдаг болжээ.

Нөгөө замын хөдөлгөөний дүрмэнд байдаг түр зогсолтын таван минут ч үүнд хамаарахгүй байгаа талаар машинаа ачуулсан иргэд гомдоллож байна. Машиныхаа овор, хэмжээнээс хамаараад 60-80 мянган төгрөг нь монголчууддаа л харьцангуй өндөр гэх торгуультай энэ ажил нэг л биш ээ.

Ингэхээр замын хөдөлгөөний ачаалал, нягтралыг бууруулах биш, машин ачих бизнесийг дэмжих, шалтгаантай нь биш үр дагавартай нь тэмцэж мөнгө олдог хуулийн гажиг болоод байна. Зарим иргэдийн хэлж буйгаар жийпнүүдийн дунд жижиг тэрэг зогсож байвал түүнийг л сугалж аваад явчихсан байдаг гэнэ.

Энэ ёстой үнэний ортой шүү. Уг нь журмандаа утсаар холбогдож зам чөлөөлөхийг анхааруулсан 10 минут олон нийтэд сонсгоно гэсэн байна билээ. Гэтэл утсаар нь ядаж хэлэхгүй, нэг удаагийн сануулга өгөхгүй ийм мөнгөний төлөө ажил явуулж байгаа хотын удирдлагуудын энэ журам нэрийн дор хэрэгжүүлж байгаа мөнгөний ажлаа цэгцлээч гэсэн саналыг иргэд маш олноор илгээсэн юм. Иймд машин ачигчид мөнгөний төлөө улайраад байгааг анхааралдаа авна уу.

О.Ууган

Эх сурвалж: