МАХН шинэчлэлийн Засгийн газраас буруу харж уйлсаар яах аргагүй гарах нь тодорхой болжээ. Дөрөв дэх удаагаа сөхөгдөж байгаа Н.Алтан­хуягаас салж явах тухай яриа энэ удаа гарцаагүй хэрэгжих муу тохироо нь бүрэлдсэн сурагтай.

Хамгийн анх 2012 оны 12 дугаар сард ши­нэч­­лэлийн Засгийн газ­рыг шилгээх тухай яриа хэсэг дүрэлзсэн ч “Цаг нь болоогүй” гэсэн “¹1”-ийн тушаалаар түргэхэн ус цацаад унтрааж байсан түүх­тэй.

Урьд нь МАХН-ын Гүй­цэтгэх товчоо хуралдсан л бол том, жижиг зургаан сайдаа засгаас татах асууд­лыг “Алтанхуягийг айл­гах” маягаар дэлгэн тавь­даг байсан. Тэгвэл энэ удаа асуудал дээд түвшинд өрнөж, ирэх гурав­дугаар сард гарцаагүй Н.Алтанхуягийг орхиж явах нэгдсэн шийдвэрт хүр­сэн гэнэ.

Өнгөрсөн Цагаан сараар Н.Энхбаяр даргатайгаа Сөүлд очин золгоцгоосон МАХН-ын дэд дарга Д.Тэрбишдагва, Сангийн сайд Ч.Улаан, УИХ-ын гишүүн О.Баасанхүү нарын бараалхалтын үеэр дуу хураагчид бичиж хадгалсан тун базаахгүй мэдээллүүд ил болж, айхтар хилэгнэсэн МАХН-ын дарга албатууддаа зайлшгүй засгаас гарах тушаал буулгажээ.

Гэхдээ үүний цаана МАН-тай яаралтай ярил­цан тохиролцох хэд хэдэн асуу­дал байгаа талаар эх сур­валжууд мэдээлж байна.

Үндсэндээ Монгол Улсын Зас­гийн газар 90 гаруй жи­лийн түүхэндээ анх удаа МАХН-гүй ажил­лах гадаад, дотоод хү­чин зүйл гарцаагүй бүрэл­дэн тогтсоныг Сөүл орж зол­госон багийнхан дундаас сэмхэн дэлгэн тавьжээ.

Хэдийгээр МАХН-ын дэд дарга, Монгол Улсын Шадар сайдаас эхлээд зарим нөлөө бүхий гишүүн ийм зүйл огтхон ч яригдаагүй гэж тас мэлзэж байгаа ч асуудал нэгэнт арга эвээр шийдэгдэхээсээ өнгөрсөн гэдгийг хамгийн ойрын эх сурвалжууд батлан хэлсээр байгаа юм.

Ямартай ч энэ Засгийн газарт салхи орох нь тодорхой болжээ. Өнгөрсөн 2013 оны наадмын дараа Ерөнхий сайдыг эзгүйч­лэн УИХ дахь АН-ын бүл­гийнхний нүдийг нь бүл­тэлзүүлэн тэвдүүлэх хэм­­жээнд хүртлээ шуугиж байсан МАХН-ын сайдууд засгаас гарах тухай асуудалд энэ удаа АН-ын нөлөө бүхий гишүүд хүч өгч, тун сонирхолтой тохироо хийгдсэн талаар ч яригдаж байна.

Хамтарсан нэртэй ч сүүлийн үед ганцаарчилсан тоглолт хийх нь ихэссэн АН, ялангуяа Ерөнхий сайд Н.Алтанхуягийн бодлого шийдвэрт тун ч урамгүй хан­дах болсон нь МАХН-ын удирдлагуудын түвшинд төдийгүй гишүүдийнх нь дунд ч хүчээ авч бай­гаа нь асуудлыг улам дэвэр­гэж байгаа ажээ.

Энэ асууд­лыг хүмүүс янз бүрээр тайлбарлаж байна. Зарим хүн “МАХН өнгөрсөн наад­мын дараа засгаас гарна гэж шантаажилж байгаад Н.Энхбаяр даргыгаа сул­луулж дөнгөсөн. Одоо тийм шантааж хийх ямар ч боломжгүй” гэж байгаа бол мэдээлэлд ойр байдаг хүмүүс “Энэ удаа асуудал өндрөө авсан. Н.Энхбаярт үүнээс өөр томоохон төлөвлөгөө байгаа нь тодорхой” гэлцэж байна.

Хэрвээ МАХН ирэх гуравдугаар сард Шадар сайд Д.Тэрбишдагва, Сан­гийн сайд Ч.Улаан, Эрүүл мэндийн сайд Н.Удвал, Хууль зүйн дэд сайд Ж.Эрдэнэжамъян, Эдийн засгийн хөгжлийн дэд сайд О.Чулуунбат, Байгаль орчин, ногоон хөгжлийн дэд сайд Б.Тулга нарын том, жижиг зургаан сайдаа Н.Алтанхуягийн толгойлсон хамтарсан засгаас хүчлэн татаж гаргавал МАХН-МҮАН-ын “Шударга ёс” эвслийн жагсаалтаар УИХ-д орж ирсэн гишүүд гудам­жинд гарч, тэдний оронд АН-аас Б.Мэдрээ, Л.Гансүх, Б.Ургамалцэцэг, А.Гансүх, МАН-аас Л.Оюун-Эрдэнэ, Ц.Гарамжав нар зө­рөөд хууль тогтоох дээд бай­гуул­лагад малилзсаар орж ирэх нь тодорхой.

МАХН-ын зүгээс засгаас гарах асуудлыг хүчтэй ярьж эхлэхийн өмнөхөн МАН-ын дарга М.Энхболд “Бид цаашид энэ Засгийн газартай хариуцлага тооц­но. Хариуцлагыг гүй­цэт­гэх засаглалын бүх түвшинд ярина” хэмээн сүү­лийн хэдэн сарын турш дууга­раа­гүй­гээр чангахан дуугараад эхэллээ.

МАХН, МАН-ын дарга нар “Би байгаа шүү” гэдгээ ээлж да­раа­лан зарласан эдгээр асууд­лын цаана энэ хаврын улс­төрийн тэмцэл хэрхэн, ямархуу байдлаар өрнөх нь шийдвэрлэгдэж эхлэв бололтой.

Ямартай ч ирэх гурав­дугаар сар шинэчлэлийн Зас­­гийн газрын хувьд тун эвгүй, хатуухан сар болох нь тодорхой болжээ.

Д.Түвшин

Эх сурвалж: