Драмын театраас урлагт хөл тавьж байсан МУГЖ У.Уранчимэг, СТА Д.Ганцэцэг, А.Ганчимэг нар өнөөдөр “Зэрлэг цэцэгсийн хүлэмж” киноныхоо нээлтийг хийх гэж байгаа билээ.

Харин өнгөрсөн хугацаанд шар хэвлэлээр жүжигчин бүсгүйчүүдийг энэхүү киноныхоо зураг авалтаас болж театраас хөөгдсөн, арга хэмжээ авахуулсан хэмээн бичигдэх болсон.

Тэгвэл энэ мэдээлэл үнэн болохыг тэд киноныхоо нээлтэд зориулсан хэвлэлийн бага хурлын үеэр хэллээ. Тэрээр энэ талаар жүжигчин СТА  Д.Ганцэцэг хэлэхдээ “Театраас бид киноныхоо зураг авалтыг хийхээр хоёр өдрийн чөлөө авсан. Харин хуралдаа ирж амжаагүй. Энэ утгаараа бид гуравтай гэрээ хийх боломжгүй гэсэн. Энэ бол театрын зайлшгүй тавих шаардлага. Яагаад гэвэл өнөөдөр Улсын Драмын Эрдмийн театр гэх тэр том театрын уран бүтээлч болсон хэнд ч алдах эрх байхгүй. Тэр битгий хэл таван минут ч хоцрох ёсгүй. Энэ утгаараа бид өөрсдөө хүлээн зөвшөөрсөн. Мэдээж хэн ч гэсэн алддаг. Харин эргээд биднийг аваач гэж гуйх нүүр үнэхээр байгаагүй. Тиймээс бид театраас төрөн гарсан жүжигчид учир театртаа бэлэг барих үүднээс өөрсдөө бие дааж уран бүтээлээ хийхээр болсон. Ингээд үндсэндээ бид гурав өнөөдрөөс эхлэн “Хувьсал” продакшнаар овоглож байгаагаа албан ёсоор зарлаж байна. Өдий зэрэгтээ хүргэсэн театрынхаа ахмад уран бүтээлчдэд талархлаа илэрхийлье” гэв. Ямартай ч Драмын театрын нүүр царай болж явсан гурван сайхан бүсгүй маань театраасаа хөөгдсөн ч уран бүтээлээ үргэлжлүүлсээр байгаа. Ингээд сайхан бүсгүйчүүддээ урлагийн их амжилт хүсье.

Эх сурвалж: Шуурхай.мн