Төрийн албан хаагч гэдэг чадалтай, боловсролтойд нь биш мөнгөтэй, нөлөөтэй, эрх мэдэлтэй, танил талтайд нь олддог алба болсон.  Хэр баргийн аавын хүү аль нэгэн яам, агентлагийн газарт ажилд ороход тун бэрх. Толгой сайтай байлаа ч танилгүй бол хүссэн газраа хүссэн мэргэжлээрээ ажиллах боломжгүй.

Харин баячуудын хүүхдүүд өөр. Тэд гурван төрд нүүртэй хүмүүс. Жирийн иргэний мөрөөдөөд ч  хүрч чаддаггүй суудалд томчуудын хүүхдүүд толгойгоо зовоохгүйгээр тухалдаг болсон нь  Монголын өнөөгийн нийгмийн олон төрхийн нэг өнгө болчихжээ.

Ерөнхийлөгч асан Н.Энхбаярын хүү Э.Батшугарыг Монголбанкны дэд захирлын албанд төвөггүйхэн морилсныг олон нийт мартаагүй байгаа.  Өөрийнхөө чадлаар гэхээсээ  аавын нь улстөрийн нэр нөлөө байсныг үгүйсгэх хүн гарахгүй биз.  Тэгвэл “Эрдэнэт” үйлдвэрийн захирлаар ажиллаж байхдаа их хэмжээний мөнгө угаасан хэрэгт холбогдон шалгагдаж буй Ч.Ганзоригийн хүү Г.Тэмүүлэн саяхан “Оюутолгой” төслийн ТУЗ-ын гурван гишүүнээр сонгогдсон.  Жилдээ 40 мянган ам.долларын сул цалинтай энэ албыг мөрөөдөгсөд олон байхад түүнийг томилсон учир шалтгааныг “сайн” эцгийн нэр нүүртэй холбон үзэх хүмүүс ч байна. Тэрбээр МАН-ыг эрх барьж байх үед “Эрдэнэс МГЛ” компанийн дэд захирлын албанд бэрхшээлгүйгээр томилогдсон нэгэн.

Хөрөнгийн биржийн захирал Х.Алтайг Элчин сайд асан Л.Хангайн хүү гэдгийг мэдэхгүй хүн ховорхон болов уу. Жирийн нэгэн айлын хүүд олдохгүй суудалд тухлаад удаж буй түүнийг гурван төрд нүүртэй гэж тодорхойлоход буруудахгүй биз. МАН-ын даргын суудлыг Их хурлаараа авахаар төлөвлөж суугаа М.Энхболдын хүү Э.Анар мөн л Монголбанкинд ажилладаг. Тэгвэл Хөрөнгийн биржээр овоглохоо дөхсөн Сэлэнгийн Р.Содхүүгийн охин С.Гэрэлмаа Монголын хөрөнгийн биржид томоохон алба хашдаг.

Монголын хар захын ганц баян гэгддэг Ш.Сайхансамбуугийн охин  С.Эрдэнэтуул төрийн албан хаагч болсоор удаж байгаа.  Өдөртөө хэдэн зуун саяын орлоготой том баяны охин төрийн албан хаагчийн цалинд шунаагүй нь тодорхой. М.Энхсайханы охин Э.Хон­горзул  “Оюутолгой” компанид томоохон алба хашдаг мэдээлэл байгаа. Тэгвэл УИХ-ын гишүүн асан Р.Бадамдамдингийн хүү Б.Баттүвшин Жижиг, дунд үйлдвэрлэлийг дэмжих сангийн даргаар ажилладаг. Дэд сайдын суудлын төлөө санаархаад дийлээгүй түүнийг Ардчилсан намынхан хоосон үлдээхийг хүсээгүй биз. ХЗДХ-ийн сайд асан, УИХ-ын гишүүн  Ц.Нямдоржийн хүү Н.Анхбаярыг АНУ-ын Сан-Франциско хотын консулаар томилсон.  Хүн амын хөгжил, нийгмийн хамгааллын сайд С.Эрдэнийн хүргэн Г.Энхболд Баянзүрх дүүргийн Засаг даргын орлогч. УИХ-ын гишүүн Г.Батхүүгийн хүү “Эрдэнэс Тавантолгой”-д ажилладаг гээд хөрөнгөтэй аавын цуутай хүүхдүүдээр төрийн яам, агентлагийн газар дүүрчээ.  “Үндэстэй модны үр жимс хүртэл амттай” гэж энэ байх даа.