Эрэн сурвалжлагдах дээрээ тулж байсан “Ноёд” группын захирал Г.Буяндоржийг саяхан цагдаагийнхан баривчилж, саатуулсан байна. Эх сурвалжийн мэдээлж буйгаар “Г.Буяндорж нь 2008 онд залилангийн хэрэгт холбогдож, уг хэргийн шүүх хурал хэд хэдэн удаа товлогдсон ч ирэхгүй байгаа. Энэ нь шүүн таслах ажиллагаанд санаатайгаар саад учруулж байна гэсэн үг. Энэ нь түүнийг албадан баривчлах үндэслэл болно” гэж байлаа.

Г.Буяндоржийг бусадтай бүлэглэн ихээхэн хэмжээний мөнгө угаасан байж болзошгүй хэмээн УМБГ-ын Эдийн засгийн гэмт хэрэгтэй тэмцэх газарт шалгаж байгаа. Энэ сарын 12-ны өдөр түүнд ШШГЕГ-аас зарлан дуудах хуудас илгээн, дуудсан хугацаанд ирэхгүй бол албадан баривчилна гэж байсан билээ.